Governor-in coaching a hawng

Governor Dr Hari Babu Kambhampati chuan nimin khan Assam Rifles, National Integrity & Educational Development Organisation (NIEDO) leh Axis Bank ṭanghoin Zokhawsanga 2nd Assam Rifles complex-a JEE, NEET etc. hmachhawn turte tana coaching an buatsaih ṭum hnihna a hawng.

Governor chuan, Axis Bank, NIEDO leh Assam Rifles-te hmalakna chu Mizoram ṭhalaite tan a hlut thu a sawi a, "Zirna hi ram leh hnam tihhmasawnna atan bakah inpumkhatna atana hmanraw thil ti thei ber a ni. Zirlai zinga chhungkaw khawsak harsa zawkte tana India rama zirna-in ṭha filawra luh theihna kawngka hawn a ni hi a lawmawm hle," a ti.

NIEDO coaching-a lut tur hian district hrang hrangah entrance exam buatsaih a ni a, a ti ṭha zual 30 thlan chhuah an ni. A thlawn vekin coaching kalpui a ni a, thla li chhung an inzirtir dawn a ni.