Education Minister hluiin school upgrade chungchang a sawifiah

Mizoram Assembly-a opposition leader Lalchhandama Ralte, Education minister hlui chuan MNF sorkar tàwp lama sikul tam tak dinhmun sang zawka hlan kai chungchangah, dan loa thil ti anga sawi an ni chu sorkarna la chan ngai loh vanga thil awmzia hriat loh vang niin a sawi.

Lalchhandama Ralte hian nimina Mizo Hnam Rûna inkhawmah thu sawiin, "Sikul tam tak dinhmun ṭhaa hlankai a nih chungchangah dan loa kal anga min puh­tute hian sorkarna an la chelh ngai loh avangin thil awmzia an hre lo a ni. Tehna felfai tak hmangin Cabinet thutlukna anga policy siam tihlawhtling turin recruitment rules duan mek a ni," a ti a; MNF sorkar sa kah thlûk tawh chu ZPM sorkarin an ṭhuat niin a sawi.

Opposition Leader chuan, "Sorkar hmasa thil tih sût leh bura an kal hi democracy zah lohna a ni. A rang thei ang berin heng sikul tam takte upgrade-na order hi chhuah turin kan sorkar hi ka ngen a ni," a ti.

Lalchhandama Ralte chuan, Covid-19 vanga sorkar laipui aṭanga sum hmuh tur vbc. 2,300 chuang hmuh loh a nih thu te, 15th Finance Commission aṭanga sum hmuh tur vbc. 56 hmuh loh a nih thute sawiin, "Heng avanga harsatna namenlo kan sorkar kal tawhin a tawh thu kan sawi laia harsatna awm lo leh hlâwkpui zawk anga min puhtu ZPM-te'n harsatna a takin an hmu ta a, vawiina kan CM hian langsar takin a pholang ta ni," a ti a; CM-in June 23, 2024-ah Central Finance Minister hnenah sum harsatna a thlen thu a sawi.