MJA-te'n dragon fruit sâwrna an tlawh

MJA, Kolasib district member-te chuan June 27, 2024 khan Kolasib district-a dragon fruit sawngbawlna an tlawh a, Kolasib Agro Marketing Cooperative Society Ltd (KAMCO) hotute'n Kolasib Hmarvenga dragon fruit sawngbawl dan leh an hmalaknate an lo hrilh.

KAMCO chairman R Lalhmingthanga chuan, FOCUS, Mizoram ṭanpuinain dragon fruit tui sâwra sawngbawlna an kalpui mek tih a sawi a; dragon fruit tui sâwr dah khawlna tur tanky an neih tam loh avangin kumin chungin quintal 80-100 vel bak an lei theih loh tur thu a sawi. Tunlai hi dragon fruit thar lai a ni a, KAMCO hian Kolasib district-a dragon fruit leiin an sawngbawl mek a ni.

R Lalhmingthanga sawi danin, KAMCO Society hi kum 2022 tawp lamah din a ni a; dragon fruit tui sâwr an kalpui rual hian, sâwr loha hralh turin hma an la mek a, Shillong, Guwahati leh Agartala-ah sumdawng liante an dawr a ni. Fûr lai a ni a, kawng chhia leh harsatna dangte avangin an la thawn chhuak thei lo.

Kolasib district hi Mizorama dragon fruit thar tam ber district a ni a, kum 2023 khan quintal 800 chuang an thar a, kuminah hian qtl. 1,000 chuang thar an beisei a ni.