Hmeichhe naupang tana sorkar laipui ruahmanna siam zirhona buatsaih

Women & Child Deve­lop­ment department chuan nimin khan Secre­tariat conference hall-ah Mission Shakti leh Beti Bachao Beti Padhao (BBBP) zirhona an buat­saih a, Health minister Lalrinpuii'n a hawng.

Mission Shakti leh BBBP hi sorkar laipuiin hmeichhia harsatna tâwkte ṭanpui leh an dinhmun chawikan a, hmeichhe naupangte humhim leh zirna pek a nih theih nana ruahmanna a siam a ni.

Minister Lalrinpuii chuan, Mission Shakti leh BBBP hlawhtlinna atan sorkar laipuiin a beisei angin department hrang hrang thawhhona ṭhat a pawimawh thu a sawi a, "Ministry-in min beisei angin, he programme tihlawhtling tur leh 100-days awareness cum enrolment drive nei turin department tinte inbuatsaih a ṭul," a ti.

Lalrinpuii chuan, department tinin an hna ṭheuh ṭha taka an thawh chuan a hlawhtlin tur thu sawiin, "Mizoramah chuan state danga harsatna an tawh ang em em tâwk lo mah ila, hmeichhia leh mipate ang khata en harsa kan la ti. Kohhran, politics leh khawtlang rorelnaah te, tun hma ai chuan hma kan sawn tawh viau nâin hmasawnna tur erawh kan la ngah hle," a ti a; zirhona chuan hmasawna a thlen ngei a beisei thu a sawi.

BBBP leh Mission Shakti-ah hian line department-te chu - School Education, Health & Family Welfare, LESDE, Sports and Youth Affairs, District Council & Minority Affairs, Home, Rural Deve­lopment, Urban Deve­lopment & Poverty Alle­viation leh LAD-te a ni.

Mission Shakti hnuaiah hian Mizoramah pawh district pariatah one stop centre (OSC) siam a ni a, hmeichhia thlabâr leh harsatna tâwkte mikhual nan hman a ni ṭhin. District thar pathumah OSC din tum mek a ni. Hmeichhia leh naupangte'n harsatna an thlen theihna tur helpline siam a ni bawk.

OSC leh helpline-ah hian domestic violence (kawppui/chenpuite kuttuar) vanga puihna dil an tam ber a ni.