KHAWTHLIR

Vote 73.62% tla

Lai Autonomous District Council-a Lawngtlai Chandmary biala Member of District Council (MDC) by-election neihah vote 2,060 a tla a, 73.62% a tling. He bialah hian voter 2,798 awmin, EVM-ah vote 2,013 a tla a, postal ballot-ah vote 47 a tla thung. Vote tlate chu July 1, 2024 chawhma dar 10 aṭangin chhiar a ni ang.

Minister-in telpui

Sports & Youth Affairs minister Lalnghinglova Hmar chuan June 27, Ningani zan khan a bial chhunga Dinthar YMA Hall-ah Dinthar LC leh YMA-te'n an venga HSLC leh HSSLC pass tharte lawmpuina an buatsaih a hmanpui. Minister chuan, "Kan hnam hma lam hun atan zirlaite'n tlansan tur kan ngah. Ruihhlo leh a kaihhnawih hrang hrang lakah fihlim ang che u," a ti a; Dinthar YMA hnenah infiamna bungrua a pek tur thu a puang bawk.

DC-in pawisa la lo turin hriattir

Champhai DC James Lalrinchhana chuan Champhai district-ah state dang aṭanga lirthei lutte aṭanga pawisa khawn/lak chíng mimal leh pawl an awm tih an hriat thu a tarlang a, "State sorkar remtihna tel lo leh danin a phût vang ni loa pawisa khawn hi sorkarin a ngai thutak hle a, mimal emaw pawl angin emaw pawisa khawn/lak phal a ni lo," a ti. Hriattirna pawi sa loa tiluite chu dan anga hrem an nih tur thu a tarlang bawk.

Awareness campaign

Mizoram EIACP Hub, Mizoram Pollution Control Board chuan nimin khan Lawipu venga BSUP Housing Complex-ah House to House Environmental Awareness Campaign an hmang. Leilung leh a chhunga awmte humhalh leh venhim pawimawhzia leh a kaihhnawih thilte tarlanna thuziak an sem a, zawhna leh hriat belh duh an neihte an sawipui a ni.

Kawng khar dawn

Aizawl Traffic SP chuan thuchhuah siamin, Kanan Veng thlanmual chim vênna atan kawngpui leh side-drain siamṭhat hna thawh mek a nih avangin vawiin zing dar 9 aṭangin Kanan Veng - Ebenezer Medical Centre panna, Kanan Veng Thlammual kawng khâr a nih dawn thu a tarlang. Kawng khâr hian kawng siam hna thawh zawh a nih hma zawng a huam ang.