Myanmar kuhva ip 9,635 man a ni; Sorkarin beihpui thlak zui a tum

Vairengte chhehvela kudam, Myanmar aṭanga dan loa kuhva rah lak luhte dahna nia rinhlelhte chu tun hnaiah enfiah a ni a, kudam 71 an enfiah zinga 20-ah kuhva ip 9,635 a awm. Kuhvate chu khawih che lo turin a neitute hriattir an ni.

Home department aṭanga Vanglaini thu dawn danin, Vairengte chhehvela kudama kuhva dahte chu a neitu nia hriatte zawn zui mek a ni a, report kimchang sorkarah thehluh a, kalpui zel dan tur thutlukna siam thuai tura dah a ni.

Mizoram chhunga kuhva chingtu pawl hrang hrangte ngenna bawhzuiin Mizoram sorkar chuan chawlhkar liam ta chhung khan Myanmar kuhva dap beihpui a thlak. Kolasib district chhunga ram dang kuhva awmna nia rinhlelhte magistrate-te'n police hruaiin an dap a, kuhva chingtu society lam hruaitute'n an ṭawiawm.

Vairengte chhehvelah kudam 66 leh Buhchangphai chhehvelah kudam panga an enfiah a; kudam 20 chhungah ram dang kuhva ip 9,635 a awma chhinchhiah a ni a, kudam dang 51 erawh a ruak thung.

Hetih lai hian, Champhai district lamah chuan Myanmar aṭanga dan loa kuhva rawn lut tur khauh zawka vèn a ni a; police check gate hêlna atana kawng rûk siam aṭangin lirthei pathuma phurh kuhva ip 190 chu tun hnaiah Champhai police-te'n an man. Kawng rûkte chu chhun zan zawma vèn zui a ni.

Hmun hrang hrangah ram dang kuhva che vel vengin police-te leh kuhva chingtute chhun zan zawmin an awm. Kuhva chingtu pawl hruaitute aṭanga thu dawn danin, ram dang kuhva lo lut avanga harsatnain a vàwrtàwp a thlen tawh avangin ram dang kuhva tawlh lui lo turin mi tin an ngen a, tawlh lui man palh an awm a nih pawhin manna hmuna chinfel zel an tum thu an tarlang a ni.