Mizoramah electric connection 2,93,931

Power & Electricity department chhinchhiah danin, Mizoramah electric connection 2,93,931 a awm a; kum 2023 chhung khan Mizoramah kawlphetha megawatt 1,606.84 hman a ni.

RTI Act 2005 tlawh­chhana zawhna Power & Electricity SPIO-in a chhan danin, Mizoramah electric connection 2,93,931 a awm a, mimal, sorkar, leh pawlte a ni. Power & Electricity department hnuaia office hrang hrangte huam chin (juris­diction) chu district anga tih a ni vek lo a, circle wise-in data an vawng ṭhin.

PE department-in circle wise-a data an neih chinah Aizawl Power Circle-ah electric connection 1,08,318 awmin, chu chu connection zawng zawng aṭangin 36.85% a ni. Lunglei Power Circle-ah connection 67,083 (22.82%), Champhai Power Circle-ah connection 35,105 (11.94%), Project Circle I-ah connection 43,304 (14.73%), Project Circle II-ah connection 4,401 (1.50%) leh Trans­mission Circle-ah connection 35,720 (12.15%) a awm a, a vaiin connection 2,93,931 a ni.

SPIO tarlan danin, January-December 2023 chhung khan Mizoramah kawlphetha megawatt 1,606.84 hman a ni a, chawhrualin thla tin kawlphetha megawatt 133.90 hman ang a ni. Nikum chhung khan January tlaah kawlphetha hman ral tam berin, megawatt 159.12 hman a ni a, hman tlem ber thla July-ah megawatt 121.74 hman a ni.

Sorkar kum 2023-24 chhung khan Mizoram sorkarin kawlphetha million unit 788.71 a lei a, chu'ng zinga million unit 721.34 chu hman a ni.

Financial year 2023-24 chhung vekin Mizoram sorkarin electric bill aṭangin cheng vbc. 571.37 a hmu a; kawlphetha lei nan cheng vbc. 531.95 a hmang tih SPIO chuan a tarlang.

Kawlphetha la luhna khua a awm leh awm loh zawhna chhangin SPIO chuan, khaw 13 a awm thu a tarlang a, chu'ngte chu - Palenasor, Mualbu Lui, Bualsury, Tlabung Dinthar, New Tuidamchhuah, Bungtlang South Zero Point, Borlui, New Laisawral, New Khamrang, New location Silsury East, Lambasora, Buisek leh Dulsury-te a ni. "Êng pek hun tur sawi theih a ni lo a, Revamped Distribution Sector Scheme (RDSS) hmanga tihèn tura hmalak mek a ni," a ti.

Kum 2023-24 din­hmun angin Mizoram­ah kawlphetha siam chhuah­na hmun 12 a awm thu SPIO chuan a tarlang a; chu'ng hmun aṭangte chuan kawl­phe­tha megawatt 55.90 siam chhuah theih a nih thu a tarlang bawk.