Pawi khawihtu hremna dan thar pathum vawiin aṭangin hmang ṭan dawn

Vawiin July 1, 2024 aṭangin India ram pumah pawi khawihtute hremna dan thar pathum hman ṭan a ni dawn a; Administrative Training Institute (ATI)-ah June 24, 2024 aṭanga khan dan thar pathumte chungchang zirhona 'Orientation Programme for New Criminal Laws' buatsaih niin, June 29, Inrinni khan khâr a ni.

Zirhona hi Judicial Academy, Assam, Gauhati High Court leh Law & Judicial department-in dan hmanga roreltu Mizoram Judicial Service officer-te leh sorkar ukil (public prosecutor)-te tana an buatsaih a ni a; MJS officer 48 leh public prosecutor 50 an tel.

Khârna inkhawmah hian Judicial Academy & NEJOTI director Justice (Rtd) Mir Alfaz Ali chuan, dan ṭha tak awm mah se, a kengkawhtute kutah thui tak a innghah thu a sawi a; harsatna leh dâltu karah pawh theihtawp chhuaha dan kenkawh tumna rilru pu turin training-a telte a chah.

Chief secretary Dr Renu Sharma pawhin thu sawiin, dan tharte Mizorama hman a nih theihna tura hmalakna hrang hrang awm tawhte a tarlang.

Misual leh dan bawhchhiate hremna dan thar (major criminal law) tharte chu - Bharatiya Nyaya Sanhita (BNS), Bharatiya Nagarik Suraksha Sanhita (BNSS) leh Bharatiya Sakshya Adhiniyam (BSA)-te a ni.

BNS hian Indian Penal Code, 1860 a thlak dawn a, BNSS hian Code of Criminal Procedure, 1973 thlakin, BSA-in Indian Evidence Act, 1872 a thlak ang.

BNS-ah hian bung (section) 358 a awm a, a thlak tâk IPC-ah bung 511 a awm; dan bawhchhiat theihna chi 20 dah belh a ni a, lung-in tàn theihna pawh 33-ah tihpun a ni. Vantlang hna thawk (community service)-a inhrem theihna tur dan bawhchhiatna chi ruk leh inhrem ngei ngei ngaihna chi 23 dah belh a ni.

BNSS-ah bung 531 a awm a; a hnuaiah police-in mi an kawl theih chhung chu dan bawhchhiat azirin ni 15 aṭangin ni 90-ah tihpun a ni. BNSS-in a thlak tâk CrPC-ah bung 484 a awm thung.