Aijal Club-ah Remna Ni pualin hun hmang

Aijal Club chuan June 28, 2024 tlai khan Aijal Club-ah Remna Ni (June 30) pualin hun an hmang a, Governor Dr Hari Babu Kambhampati leh chief minister Lalduhoma ten hmanpuiin, remna thuthlung, Memorandum of Settlement ziah kaihhnawiha mi pawimawh mi eng emaw zat hnenah chawimawina hlan a ni.

Hari Babu Kambhampati chuan Mizoram mipuite remna Ni chibai a bûk tih sawiin, inremna thuthlung ziah chuan remna leh muanna, inpumkhatna leh hmasawnna kawnga ke pên duhna a tihchian thu a sawi a, "Remna thuthlung ziah ni hi kan ram ropui tak chanchin ziahnaah hmun pawimawh a chang reng tawh a ni," a ti.

Remna a awm theihna tur leh Mizoram tana hma lam hun êng zawk siam tura remna kawnga thawktute chungah a lawm thu sawiin Larsap chuan, "Mizoram Peace Accord hi kan state tana beiseina êng leh mi dangte tan pawh khâwnvâr anga chiang taka hmuh theih beiseina êng leh entawn tur, remna thuthlung hlawhtling tluantling awm tlemtê zinga mi a ni," a ti a; remna thuthlung ziah a nih theihna tura hma latute hming a sawi lang.

Governor chuan, remna thuthlung ziah a nih theihna atana theihtawp chhuahtute - MNF dintu Laldenga, chief minister hlui Lal Thanhawla, MNF leh India inkara palai hna thawktu Lalduhoma te, chief minister hlui Brig. T Sailo leh Zoramthanga te hnathawhte a sawi lang bawk.

Chief minister Lalduhoma chuan, Mizoramah remna leh muanna a awm theihna tura theihtawp chhuahtute inpekna ropui a tih thu a sawi a, "Mipui ṭawngṭaina Pathianin a chháng a, remna kan neih theih bakah he remna hi a tluantling a, kan vannei hle a ni," a ti.

Lalduhoma chuan, Mizoram hun tawn tawh aṭangin inzir a pawimawh tih sawiin, "Tunah chuan remna leh muanna duhtu kan nih angin India khua leh tui rinawm tak nih kan tum a pawimawh. India ram hi khawvelah hnuai hnuaihnung leh tlem zawkte tana zâwldawh ber leh ngaihven ber ram a ni a, kan vannei hle a ni," a ti a; remna leh muannain rah ṭha a chhuah ṭhin thu leh, hmasawnna leh changkanna nei turin remna leh muanna vawn nun a ṭul thu a sawi bawk.

Remna Ni puala hun hmanah hian Laldenga (L) (a aiawhin a nupui Lalbiakdiki), Lal Thanhawla, inremna ziah laia Mizoram chief secretary Lalkhama, chief minister hlui pathum - Ch Chhunga (a aiawhin a nupui Rothangi), Brig. T Sailo (L) leh Zoramthanga bakah, chief minister Lalduhoma te hnenah chawimawina thilpek hlan a ni.

Mizoram Circa 1960 to 1990 tih video thlirho a ni a; The Aijal Club president Dr Renu Sharma, chief secretary-in thu a sawi bawk.

Remna thuthlung, Memorandum of Settlement kha June 30, 1986-ah ziah a ni a; MNF aiawhin president Laldenga, India sorkar aiawhin Home secretary RD Pradhan leh Mizoram sorkar aiawhin chief secretary Lalkhama ten hming an ziak a ni.