Hun tiama kawng siam zo turin chah

Assembly deputy speaker Lalfamkima chuan June 29, Inrinni khan a bial chhunga National Highway-54/6, RTP Farm leh Seṭhawn inkar kawng leh Kawnpui quarry bula kawng siam mek a enfiah a; sorkarin inkalpawhna kawngpui a ngaih pawimawh thu sawiin, hna thawktute chu hun tiam chhunga thawk zo turin a chah.

Lalfamkima chuan, "Hun rei tak chhung Aizawl panna kawngpuiah lirthei kal velte'n harsatna an tâwk hi a pawi," a ti a; hna enkawltu NHIDCL leh an hnuaia contractor-te chu mipui mamawhna hriaa hun tiam chhunga thawk zo ngei turin a hrilh a ni.

Sorkar thuchhuah tarlan danin, kawng chhiaah hian lirthei veivak a tangkhan loh nan leh hnathawh a buai loh nan chhun lamah contractor-in traffic duty a ruahman a, zan lamah Kolasib leh Kawnpuia police-te an duty bakah, Thingdawl YMA-in an pui ṭhin.

Deputy Speaker hi NHIDCL hotu te, PWD SDO Lian-hmingthanga, Kolasib District MJA hruaitute leh contractor aiawhte'n an ṭawiawm a ni.

NATIONAL HIGHWAY-54/6

■ Kolasib leh Kawnpui inkara RTP Farm leh Seṭhawn khaw inkar leh Kawnpui quarry bula kawng chhe zual zual lai, ruah a sur chânga lirthei tànna ṭhin chu NHIDCL hnuaiah contractor C Lalhluna, Aizawlin a thawk mek.

■ C Lalhluna hian RTP Farm leh Seṭhawn inkar leh Kawnpui quarry bula kawng chhe zual lai hi meter 200 ve ve dry lean concrete (DLC) leh pavement quality concrete-in an siam mek.

■ DLC hi inchi 6-a chhah niin, a chungah hian PQR inchi 10-a chhah chhùn a ni a, a zau zawng meter 7 tur niin, a chanve (metre 3.5) chhùn mek a ni.

■ Kawng siam hna hi July 12, 2024-ah zo hman tura ruahman a ni.