Pawi khawihtu man thuai phut

Armed Veng South Local Council, YMA, MHIP leh MUP hruaitute June 28, Zirtawpni zana ṭhukhawm chuan an veng mi Lalrinmawia (34) s/o Lalsangzuali thattu man thuai an phût.

Armed Veng South LC leh tlawmngai pawlte chuan an ṭhutkhawm zawhah thuchhuah inṭâwm an siam a, "June 27, 2024 (Ningani) zinga Lalrinmawia (34) s/o Lalsangzuali, Armed Veng South-in mi kut tuara Ṭhuampui venga a thi hi hriatthiam harsa kan tiin, kan lung a awm thei lo," an ti.

Tualthihnaa pawi khawihtute a rang thei ang bera man chhuak a, a phu tâwka hrem ngei an duh thu tarlangin Armed Veng South LC leh NGO-te chuan, "He tualthihna a pawi khawihtu chhui chhuahna kawngah police tha tichak turin kan inpeih reng," an ti a; tun hnuah tualthihna thleng tawh lo se an duh thu an tarlang.

Hetih lai hian, he tualthihna kaihhnawihah hian police-te chuan mi pakhat an man tawh a, tualthattu a nih leh nih loh erawh finfiah theih a la ni lo.