MJA-in cricket stadium-a project an tlawh; CAM-in GST vbc. 10.2 an chhûng lut tawh

MJA General Headquarters member-te chuan June 29, Inrinni khan Suaka Cricket Stadium, Sihhmuia 1st Veteran Cricket Tournament final match leh cricket stadium tihchangtlun hna thawh mekte an en. CAM hruaitute chuan, Mizoram sorkarah GST cheng vbc. 10.2 an chhûng lut tawh tih an sawi.

MJA member-te hi cricket final khelh zawhah CAM hruaitute chuan an president Lalrochhuanga hoin Suaka Cricket Stadium tihchangtlun hna thawh mek an fanpui a, an hmalakna kal mekte an hrilhfiah a ni.

CAM hruaitute chuan, Suaka Cricket Stadium-ah project pahnih an kalpui mek a, an zawh hunah chuan international match pawh an thleng thei dawn tih an sawi a, "Ground bik hi chu international match khelhna tlak a ni a, mahse, player-te inthlâkna leh mamawh hrang hrangte kan la neih ṭhat loh avangin kan la thleng thei lo. Tuna kan project pahnih hi kan zawh hunah chuan international match kan thleng thei ang a, Ranji Trophy velah pawh home match khelh nan hman theih a ni tawh ang," an ti.

CAM President chuan, CAM chu kum 2018-ah BCCI-ah direct-in an lut tih sawiin, "Kum 2018 aṭanga kumin thlengin Mizoram budget pawn aṭangin cheng vbc. 231.9 kan hai lut tawh a, Mizoram sorkarah GST cheng vbc. 10.2 kan chhûng lut tawh. Player-te hnenah cheng vbc. 158 kan pe chhuak tawh bawk," an ti a; Mizoram economy atan an thawh hlâwk ve hlea an hriat thu an sawi.

CAM hruaitute sawi danin, an project pakhat chu CAM-in project an siam cheng vbc. 31.5 sênna tur a ni a, chhawng lia sak tur a ni. Inkhel entute ṭhutna tur gallery leh mikhual thlenna tur, player-te inthlakna tur, eirawngbawlna leh chaw eina tur, physiotherapy room, media room, commentator room, referee room, VIP room, office, multipurpose room, indoor game room leh thil dang eng emaw zat a awm dawn.

Cheng vbc. 18 sênna tur project an nei bawk a, BCCI project a ni thung. Indoor cricket pitch, swimming pool, gym leh thil dang eng emaw zat a awm dawn a ni. Project pahnihte chu kum 2025 chhungin zo hman turah an in ngai a ni.

Cricket chu eizawnna tlak a ni ni mai lo a, hausak theihna a nih thu sawiin CAM hruaitute chuan, "Cricket hi eizawn a tling a ni mai lo a, hausak theihna a nih avangin Mizo naupang leh ṭhalaite'n cricket khel sup sup se kan duh," an ti.

CAM hruaitute chuan, Suaka Cricket Stadium awmna chu Aizawl aṭanga a hlat tham avangin mi tam tak tan pan a harsa a, chuvang chuan Aizawlah cricket khelhna tur hmun an mamawh hle tih an sawi bawk.

1st Veteran Cricket Tournament final-ah hian Ditea's team leh Assam Rifles team an intum a, Ditea's team chu run 31-a chakin an champion. CAM chuan MJA member-te hi zanriah an lo buatsaihsak a ni.