Bawngkawn-Durtlang inkar kawnga leimin vangin mipuiin harsatna an tâwk
Bawngkawn-Durtlang kawng, Haflong venga in sakna tura kawngpui chhak lam laih chu June 29, Inrinni zing khan a min a, mipuiin harsatna an tawh phah nasa hle. Lei laih chungchangah hian AMC chuan thuchhuah siamin, AMC-in lei laih phalna a pek loh thu an tarlang.
Bawngkawn-Durtlang inkar kawngpui chhak lama lei laih vanga leimin hian Inrinni chhun khan kawngpui a hnawh pin bakah kawng khâr zui a ni a, Zuangtui-Durtlang kawng a chhiat em avangin mipuiin harsatna an tâwk nasa hle nia thu dawn a ni. Lei hi min belh leh mai thei tura ngaih a awm avangin Inrinni leh nimin khan kângṭhelh motor hmangin tuia phuh a ni.
Lei minnaah hian nimin lamah pawh lei tla a awm deuh reng a, kawngpui tlang tawh mah se, lirthei, chhuk zawng leh chho zawnga kalte chu a inchhâwka kaltir an ni.
Leimin chungchangah hian Aizawl Municipal Corporation (AMC) chuan thuchhuah an siam a; leiminna hmun chu Inrinni zing dar 9-ah Aizawl District Disaster Management Authority kaihhruaiin AMC, Geology & Mining, PWD leh department dang ṭhenkhat hotu (Joint Inspection team)-te'n an enfiah thu te, lei tla leh mai thei a la awm avangin chhiatna a thlen loh nan kawng khâr a nih thute an tarlang.
Joint Inspection Team chuan lei laitu Lalhruaisanga, Chawntlangpui, Lawngtlai district chu rang taka leimin chhunzawm thei laite tifai nghal tura an hriattir thu tarlangin AMC chuan, "Hna a thawh zawh veleh Aizawl DDMA hnuaia Quick Response Team kaihhruainain a hmunhma ṭha takin khuh nghal tura ruahmanna siam a ni a, kawng kal tan a him tih a chian hnuah chauh kawng hi hawn ni se tih a ni," an ti.
AMC chuan, "Leiminna hmunah hian lei laih phalna (SDSM permit) hi AMC chuan a pe lo a; kum khat chuang kal taah khan leiminna chhak deuhah hian Pu Lalhruaisanga hi uluk taka lei laih dan tur khuahkhirhna (condition) siamsakin lei laih phalna permit pek a ni a; mahse, permit ang thlap hian vawiin thlengin hma a la lo a, a permit hi a thi tawh nghe nghe a ni," tiin an tarlang.