KHAWTHLIR

Dang chhunzawm

Central Young Lai Association (CYLA) chuan an district kaltlanga Myanmar-a tuialhthei phurh luh tur chu an la dan chhunzawm zel. CYLA hian tuialhthei a hlawma Myanmar-a phurh luh a tam avanga mipui leh hnathawktu company-te'n harsatna an tawh phah avang leh, Myanmar-ah indona hmanruaa hman a nih avangin June 24, 2024 aṭang khan Myanmar-a tuialhthei phurh luh hi an khap a, vengtu an indah a ni.

MLA-in enfiah

Siaha bialtu MLA Dr K Beichhua chuan June 29, Inrinni khan kum 2019-20-a Ministry of Tribal Affairs aṭanga a dil chhuah leh a hun laia bul ṭan, Siaha Vaihpi-a Multipurpose Community Centre sak, tun thlenga la sak zawh loh chu a hmunah a enfiah. Dr K Beichhua chuan, Centre sak chu a tira DPR anga an sak laiin, tute emaw pawl phuahchawp Vengchhung Development Board intite'n an duh angin an tidanglam a, badminton khelh nan thuneitute hnenah nawrin an siam danglam niin a sawi.

ADCC intuaithar

Aizawl District Congress Commitee chuan June 29, Inrinni khan Zabiaka Farm, Maubawkah infuihtharna hun an hmang. ADCC president Lalhmingthanga Pachuau chuan, politics-a an inhmanna chu an hma lam hun atan leh ram tan a pawimawh thu a sawi a, "Party-in eng nge min tihsak ang tih ni loin, party tan eng nge ka tih ang tih kan ngaihtuah a, ṭan kan lak a ngai. Huaisen taka chona kan hmachhawn phawt chuan chakna kan chang ang a, hlawhtlinna kan chang dawn a ni," a ti.

Unau inkara buaina pawiti

Zo Re-Unification Organisation (ZORO) Gen.Hqrs chuan thuchhuah siamin, Zo hnahthlak - Zomi, Chinland Council/CNF/Chin Brotherhood, adt. inkara thu inhmuh fuh loh vanga buaina awm chu pawi an tih thu an tarlang a, "Kan unaute hi thlah khat, thisena inzawm vek kan ni a, lungrual taka awm tur leh unau kan nihna tilang turin kan duh," an ti. ZORO chuan, remna palai hna an thawh thu te, a huhoa inbiakna nei leh turin an ruahman mek thu te, inbiakna a rang lama neih thuai tum a nih thute an tarlang bawk.