India leh MNF inremna hi India emaw, Mizo mipui emaw duhthusam a ni lo - Zoramthanga

MNF party chuan Remna Ni (June 30) pualin nimin khan Mizo Hnam Rûnah hun an hmang a; MNF president Zoramthanga chuan, India leh MNF inremna chu India emaw, Mizo mipui emaw duhthusam a ni lo a, pawm tlân theih tura duan a nih thu a sawi.

MNF President hian remna thuthlung chu India sorkar leh Mizo mipui duhthusam a nih loh thu sawi nawn lehin, "He remna hi India emaw Mizo mipui duhthusam a ni lo a, kan pawm tlan theih tura duan a niin, sign hnan a ni... Remnaah hian tu mah rálbáng bik awm loin kan zavaiin kan tel a, a humhim pawh kan zavaia mawhphurhna a ni," a ti.

Remna nei tura kohhran mi, zirlai pawl leh mi chi hrang hrang ṭhahnemngaite'n remna an duhzia an sawi ṭhin tih sawiin Zoramthanga chuan, "Harsatna tam tak kan tawh kha tuna remna tura Pathian remruat a lo ni zel a ni," a ti a; inremna kalkawngah thil tam tak a thleng a, Bangladesh a pian hial thu a sawi.

Zoramthanga chuan, sorkar laipuia BJP sorkarah India Danpuia Article 371G chu nghîng tura ngaih a nih thu sawiin, "State dangin special provision an neih hi chu khawngaihnaa pek a ni a, keini neih hi chu engti kawng maha tih­danglam theih loh a ni. Remna neihna tur hian MNF-in tih hmasak tur tam tak kan nei a, kan dan hman mek pawh India dan kalh loa siamrem a ngai. Kan ralthuam zawng zawng surrender loin, kan hand over a ni. Kan tih tur kan tih hnuah anni'n Article 371G hi min hlan," a ti.

MNF President chuan, "Article 371G hi min chhuh dawn a nih chuan a man kan pek tawh kha min pek lêt leh a ngai dawn. An kuta kan hlan hi India hian min pek lêt tur a nei tam em em a, min pek lêt erawh thil tih chi a ni lo ang," a ti a; a man an pek tawh chu India-in a pe lêt leh dawn a nih chuan Supreme Court-ah an zualko nghal a ngaih tur thu a sawi.

Inremna neih laiin thlan lal ni lo, Laldenga sorkar hnuaiah MNF-in an ralthuamte an tun thu sawiin Zoramthanga chuan, "Kan dote thuneihna hnuaia kan chakna thahrui hlan kha rem kan ti lo a, ram mipui aiawha zalenna sualtute himna tur ngaihtuah lâwk râna he remna hi neih a ni," a ti.

MNF-in Remna Ni puala hun an hmannaah hian Mizo hnam tana martarte sûn nan ngawi rengin minute khat an ding a ni.