UC lema sum lapse tur dan aiin Pathian ṭihna avangin kan hnâwl - F Rodingliana

Minister of state F Rodingliana chuan, utilization certificate (UC) lem hmanga SASCI sum kîr (lapse) tur dan ai chuan, ram leh sorkarin malsawmna a dawn zel theih nan Pathian ṭihna avangin an hnâwl thu leh, SASCI sum hmanga 2023-24 hna thawhah ZPM sorkar a inrawlh loh thu a sawi.

Nimina ZPM pisaa inkhawmah thu sawiin F Rodingliana chuan, "Council of Minister ṭhukhawm chuan ngun takin kan ngaihtuah a, UC lem hmanga sum lapse tur dan beh ai chuan, kan ram leh sorkarin malsawmna kan dawn zel theih nan Pathian ṭihna avangin kan hnâwl a ni. SASCI 2023-24 hnaah hian sorkar thar hi a inrawlh lo hrim hrim," a ti.

F Rodingliana chuan, "Sorkar hmasain SASCI sum a hman dan leh a kalpui dan zir chian chuan a bilha tho lo a ni a, ni khat thilthuah hna lian tak tak hmun 270 vela mi chu mi 43 hnenah pek chhuah a ni a, Election Model Code of Conduct-in a phuar zui leh ta si a ni," a ti a; SASCI sum lapse chungchangah mi ṭhenkhatin ZPM sorkar thiam loh anga thu an thehdarh chu pawi a tih thu a sawi.

Kalphung thar, mipui sorkar hnuaiah Mizoramin tun hmaa a la zawh ngai loh kawng a zawh mek nia sawiin Rodingliana chuan, "Kum 37 chuang kalphung hluia kan lo kal tawh avangin mipui leh sorkar office-a thawktute pawhin ngaia kan lo neih tawh thil tam tak a awm. Kalphung thar hi kan zir tlàn a ngai a, kalphung thara kal thei turin kan indàwm kàn tawn a ngai," a ti a, ṭawngṭaina nena sorkar dinpui turin mipui a sáwm.

Power & Electricity minister F Rodingliana chuan kawlphetha chungchang sawiin, "Tunlai hian power supply a khaihlak fo a, hei hi distribution loss tihtlem nan hrui tê zawkte hrui liana kan thlâk mek vang a ni. Aizawl aṭangin kan ṭan a, a tahtawl zela hmalak a nih avangin kan lo thim zeuh zeuh a nih pawhin mipui hriatthiamna kan dil a ni," a ti a; electric bill siamnaa tihsual awm ṭhin tihbo nan RDSS hnuaiah smart meter reading tih tum a nih thu a sawi.

F Rodingliana chuan, Printing & Stationary department-in sikul zirlaibu subject 46 atan copy 4,96,030 an chhut thu leh sem chhuah hman vek a nih thu te, Commerce & Industries lamah, tualchhunga thil siam humhalhna tur Preferential Rules 1994 ennawn mek a nih thu te, Industrial Policy 2024 peih ṭêp a nih thu leh, Hand Holding Policy atan AMEN scheme peih a nih tawh thute a sawi bawk.