Sum tichingpentute court-in a hrem

Self help group (SHG) hrang hrang hnena loan pek chhuah sum eng emaw zat tiching­pentu - State Bank of India (SBI), Mission Veng Branch manager ṭhin Lalkhomang Guite leh Sacred Heart Society neitu Gary T Haokip te chu Special Court (Prevention of Corruption Act) chuan kum li chhung táng tur leh Rs 10,00,000 ve ve chawi turin a hrem.

He thubuaiah hian Special Court (PC Act)-a special judge Dr HTC Lalrinchhana chuan Lalkhomang Guite leh Gary T Haokip-te chu IPC Section 120-B [r/w IPC 420, 468, 471] leh PC Act Section 13(2) [r/w 13 (1)(d)] tlawhchhanin June 28, 2024 khan thiam loh a lo chantir tawh a; anmahni hremna tur nimin khan a puang leh a ni.

Special Court (PC Act) chuan Lalkhomang Guite leh Gary T Haokip te chu kum li chhung lung-ina táng tur leh Rs 10,00,000 ve ve chawi tura a tih bakah, pawisa an chawi loh chuan kum hnih dang tàn belh turin a ti bawk. An tàn hun chhungah hian an lo tàn tawhna chhiar tel tur a ni thung.

Sum tichingpentute hremna a pek dan Court-in a tarlanah chuan, PC Act, 1988 Section 16-in an pawisa khawih chingpen hisâp tura a tih chu ngaihtuah tel a nih thu te, an sum tihchingpen a tam thu te, an dan bawhchhiatna a danglam thu te, ngampa takin chinchang hre lo zawkte hmangin sum an tihchingpen thu te, mi dang tan mai bakah anmahni rilru insiam­ṭhatna atan a nih thute a tarlang.

Thiam loh chantir tâk mi pahnihte thurualpui Thangtluangi leh K Lalrem­tluanga te chu CBI-in an chhuinaah an thiam lohna an finfiah zo loah ngaiin chhuah zalen an ni a; Rosangkimi Ralte chu thubuai ngaihtuah a nih lai April 3, 2018 khan a thih avangin a thubuai ngaihtuah zui a ni lo. Sum tihchingpen hi November 2006 leh October 2007 inkara thleng a ni.