Hlimenin in pahnihna an sa zo hnai : Sorkar aṭangin sum an la dawng lo

Hlimen khawtlangin an veng mi, an in him lote chenna tur in pahnihna an sak mek chu an sa zo ṭêp. Hetih lai hian Mizoram sorkar aṭangin pawisa an la dawng lo.

Hlimen khawtlang hian chhungkaw 10 chenna tur in (relief camp) an sak zawh hnuah sorkar thuneitute'n in sakna tur an tum vek tur thu an hrilh avangin chhungkaw 10 dang chenna tur an sak belh leh. Relief camp pahnihna an sak mek chu vawiinah zawh theih an inbeisei.

Vanglaini zawhna chhangin Hlimen khawtlang hruaitute chuan, sorkar aṭangin pawisa an la dawn loh thu an sawi a, "Sorkar hotute'n in lo sa a, a senso chu min rulh leh tur thu min hrilh angin a báin hmanruate kan la khawm. Tunah hian cheng nuai 20 vel kan ba tawh," an ti.

Hlimen khawtlang hruaitute sawi danin, pawisa la tura Aizawl DC office-a an kalin a tira an sawi lan loh utilisation certificate (UC) a ngaih thu an lo hrilh. In pakhat zawk an sakna senso cheng nuai 12 lak tumin UC nen an kal leh a, mahse, DC office-a thawkte chuan cheng nuai 3 vel bak pawisa an kawl loh thu an lo hrilh leh a; cheng nuai 3 vel pawh chu an la pe lo a ni.

In sak hmasa zawkah a hmun laih zâwlna atan excavator hman a ngaih avangin cheng nuai 12 vel an séng a, tuna an sak mek hmun chu laih zawl sa a nih avangin a hmaa mi nen intiat chiah mah se, cheng nuai 8 vel an seng tawh thung.

Hmun him lama insawn chhuak tura Aizawl DC-in a hriattir zinga chhungkaw 38 chuan khawtlangin in an saka awm an duh tih sawiin khawtlang hruaitute chuan, "Chhungkaw 10 an awm tawh a, kan sak tharah chhungkaw 10 an awm leh dawn. Chhungkaw 18 chenna tur sak a la ngai," an ti.

In sakna tur ram a la awm thu sawiin, "Kan sak belh dawn leh dawn loh kan la ngaihtuah ṭha ang. Cheng nuai 20 vel kan ba tawh a, a bá tawpa han sak leh chu kan zuam tawh lo deuh," an ti a; sorkar aṭanga sum an hmuh dan azira an sak chhun­zawm leh tur thu an sawi a ni.