Stop Diarrhoea Campaign hawn a ni

Kawṭhalo do beihpui thlâkna, Stop Diarrhoea Campaign chu nimin khan Mizoram pumah hawn a ni a; thupui chu 'Kawṭhalo vên nan faina leh ORS a pawimawh' tih a ni.

Stop Diarrhoea Campaign hi kawṭhalo do beihpui thlakna a ni a, kum 2014 aṭangin kalpui a ni. Kum tin fûr laiin hman ṭhin a ni a, kuminah hian India ram pumah July-August, 2024 chhungin hman a ni ang.

Aizawlah chuan Tanhrila Health & Wellness Centre-ah Stop Diarrhoea Campaign hawn a ni a, National Health Mission mission director Dr Eric Zomawia kaihhruaiin, Health & Family Welfare principal director Dr Vanlalsawma'n a hawng.

Dr Vanlalsawma chuan, Mizoramah kawṭhalo vanga thi awm tawh lo se a duh thu leh thawktute pawhin ṭan la se a duh thu a sawi a; kawṭhalo chungchanga zawm turte ṭha taka zawm turin mipui a chah.

Inkhawmah hian RCH state programme officer Dr Lily Chhakchhuak-in Stop Diarrhoea Campaign chungchang a sawifiah a; Women & Child Development director Zoramthangi pawhin thu sawiin, kawṭhalo vanga thi an awm lohna turin WCD department-in theihtawp an chhuah tur thu a sawi.

Lungleiah chuan Chanmari-a Primary School-II ah Lunglei South bialtu MLA Lalramliana Papuia'n a hawng. MLA chuan, kawṭhalo vei lo turin inenkawl ṭhat a ngaih thu sawiin, "Khawvelah naupang kum 5 chin hnuai lam thihna thlentu pathum zinga pakhat chu kawṭhalo a ni. Mizoramah pawh ni tin mi 140 vel kawṭhalo vei an awm avangin fimkhur a ngai," a ti a; campaign a hlawhtlin theih nan theihtawpa ṭawiawm turin mimipui a sáwm.

Lunglei deputy chief medical officer Dr Lalrinthangi chuan, kum dangah chuan Intensified Diarrhoea Control Forthnight hman ṭhin a ni a, kuminah chuan Stop Diarrhoea Campaign tia hman tur a nih thu leh inzirtirna tam zawk pek tum a nih thu a sawi.

Champhaiah pawh Champhai Vengthlang Middle School-ah bawrhsap James Lalrinchhana'n Stop Diarrhoea Campaign a hawng a; "Campaign hnuaiah hian sorkar department hrang hrangte bakah tlawmngai pawlte nen thawkhoin, kawṭhalo enkawl leh invên dante zau zawka inzirtirna kalpui a ni dawn," a ti.

STOP DIARRHOEA CAMPAIGN

* India rama naupang thihna zinga 6% chu kawṭhalo vang a ni.

* Beihpui thlak chhungin naupang kawṭhalo enkawlna atana ṭha ber ORS leh Zinc ṭhatna nasa lehzuala inzirtir a ni ang.

* ASHA-te'n an bial chhungah naupang kum 5 hnuai lamte kawṭhalo damdawi an pe ang.

* Sorkar damdawi-in, sub-centre leh anganwadi centre-ahte 'ORS-Zinc Corner' siam a ni ang.

* ORS-Zinc Corner-ah hian naupang kawṭhalote chu enkawlna pek a ni dawn.

* ORS siam dan, faina chungchang, ORS leh Zinc pawimawhnate thawktute'n an hrilh ṭhin ang.