LMC Best/Cleanest Ward kalpui tur hawng

Lunglei Municipal Council (LMC)-a LMC Award 2024 for Best/Cleanest Ward kalpui tur chu nimin khan Lunglei Convention Centre-ah Urban Development and Poverty Alleviation (UDPA) minister K Sapdanga'n a hawng.

UDPA Minister chuan, LMC Best/Cleanest Ward kalpui tur chu Lunglei khawpui tana hmasawnna rahbi thar a nih thu a sawi a, "Hetiang hun ṭha leh hmachhawp ropui tak mai, faina kawnga inelna kum khat daih buatsaih a ni tur hi faina kawngah Mizoram tan meichher in rawn chhi dawn niin ka hria a, a phûrawm hle a ni," a ti.

K Sapdanga chuan, "Lunglei hi kawng hrang hrangah Mizoram tan hma hruaitu leh hnarkaitu pawimawh a ni ṭhin a, politics-ah pawh a mei chhi ṭantu a ni," a ti a; LMC inthlan hmasa berah Lunglei mipuiin ZPM party-te hnehna sang tak an pe chu Mizoram politics chanchinah thil chhinchhiah tlak a nih thu a sawi.

LMC-in ruahmannate siamin hna an thawk ṭan thei tawh dawn tih sawiin Sapdanga chuan, "LMC hi Lunglei tan mai ni lo, Mizoram pum tan entawn tlak leh bul ṭantu in nih kan beisei a, Mizoram leh Lunglei mipui beisei ang ngeiin hna an thawh ngei pawh kan beisei a ni. Ram leh hnam hmasawnna tur a nih chuan party bil sawi loa theihtawp chhuaha thawkho turin kan insawm a ni," a ti.

Khualzahawm minister C Lalsawivunga pawhin thu sawiin, "Mizoram sorkarin Lunglei khawpui hmasawnna a ngai pawimawh. Hmasawnna hna kan thawhnaah inpumkhatna a pawimawh a, mahni hmazawnah ṭheuhah theihtawp chhuah turin kan ingen a ni. Lunglei hmasawnna atan LMC chauh a pawimawh lo a, mipui pawh kan pawimawh a ni," a ti.

LMC Award 2024 for Best/Cleanest Ward kalpui tur hawnna inkhawm hi LMC vice chairman K Lalrinawma'n a kaihruai a; MLA pahnih Lalramliana (Papuia) leh T Lalhlimpuia te pawhin thu an sawi a ni.