Zirlaite intodelh lam zirtirna turin thawhhona thuthlung ziah a ni

Mizoram Samagra Shiksha leh Tharthilthlentu (TiLi)-te chuan nimin khan IPR Auditorium-ah ‘Project Intodelh Inzirtirna’ atan thawhhona thuthlung an ziak a, School Education minister Dr Vanlalthlana’n a hmanpui.

Project Intodelh Inzirtirna hi Aizawla sorkar sikul 10 - KM High School, Central H/S, KVM H/S, JL H/S, Hrangchhunga H/S, Mizo Higher Secondary School, Chaltlang HSS, Zemabawk HSS, Republic HSS leh MICE-ahte kalpui a ni dawn a; zirlaite chu mahni intodelhna lam hawi zirtir an ni ang.

Thawh dunna thu­thlung­ah hian Samagra Shiksha aiawhin state project director Lalsang­liana leh TiLi aiawhin chairman LTL Fela ten hming a ziak a; thuthlung ziahnaah hian project kal­puina tur sikul 10-a zirlaite leh zirtirtute bakah, sorkar hotute an tel.

Minister Dr Vanlalthlana chuan, zirlaite'n nih tum hrang hrang an nei ṭhin tih sawiin, "An nih tum an nih theih loh tâwpah thil siam chhuah te, sumdawnte hi an hawi chauh ṭhin a, hei hian ngaihtuahna a tithui. Mizoram hi intodelhna kawngah nasa leh zuala kan inzirtir a ṭul a, zirlai kan nih lai aṭanga ṭan a tul hle," a ti.

Nu leh pate’n an fate hnena 'Lehkha i zir ṭhat loh chuan hna i hmu lo ang' an tih ṭhin chu thlâk an tum thu sawiin Dr Vanlalthlana chuan, "Pass hram hram turin zir la, mahnia kea ding turin zir tur i la ngah, ti zawnga kan thlak a ngai. Hna hmu tur ni ringawt loin, mahni intodelh tura zirlaite zirtir hi zirnain a tum a ni," a ti bawk.