Congress party-in Remna Ni an hmang

Congress party chuan nimin khan Congress Bhavan-ah Remna Ni (June 30) pualin hun an hmang a; thusawitu Liansuama chuan, remna a awm theih nan Lal Thanhawla'n chief minister nihna a kian nia sawiin, sorkar laipuia hotute'n mak an tih thu a sawi.

Liansuama chuan, remna a awm theih nan sorkar hotute an thawkrim hle nia sawiin, "Central lama kan hotute'n Pu Hawla’n CM nihna a kian dawn a tih khan mak an ti a, inremna atana lalṭhutthleng ken hi inpekna vàwrtàwp aṭang lo chuan a theih loh. Kan hotute kha anmahni an inhlan a, méllung pawimawh tak an phun a ni," a ti.

Remna chu kohhrante leh Mizo mipui ṭawngṭaina rah a nih thu sawiin Liansuama chuan, "Remna a thlen theih nan kohhran, YMA leh MZP-te hian hma an la vek. Khatih hun lai khan chief minister Pu Lal Thanhawla, kei, Pu Rokamlova leh Pu Hipheia te khan minister nihna kan kian a ni. Kha kha inremna atana thil pawimawh, sawi hmaih theih loh a ni," a ti a; remna chungchangah Lal Thanhawla hming lam thei loh theih loh a nih thu a sawi.