Slaughter house-a cold storage Frozen vawksa dahna atan hmang

Mizoram Pig Framer's Association (MIPFA) chuan thuchhuah siamin, Bung Banglaa ran talhna (slaughter house) an tlawh thu an tarlang a, "A enkawltu hnen aṭanga thu kan dawn danin, slaughter house-a cold storage-te chu frozen vawksa dah nan hman a ni a, a hmangtu chu Malsawmi, Star Farm neitu a ni," an ti.

MIPFA tarlan danin, AH&Vety Minister hmalakpuinain June 11, 2024 khan Bung Bangla slaughter house-a frozen vawksa dah aṭangin PCR-a enfiah tur vawksa (sample) paruk lak a ni a; AH&Vety department-in sample an lak result an pekah chuan, sample paruk zinga pali chu African Swine Fever (ASF) káia rinhlelh a ni.

MIFPA chuan, slaughter house hmunhmate chu a ṭawp bakah a rimchhe tak ni ṭhin mah se, vawksa sample lak a nih lai erawh chuan an lo tihfai tawh thu te, cold storage-ah pawh vawksa tlem tê chauh a lo awm tawh thu te, slaughter house leh a chhunga frozen vawksate chu Mizorama ASF nasa taka darh mekah a chhan pakhat a nih a rinawm thute an tarlang.

Kum 2021-a Lungsen aṭanga ASF hri léng ṭan ni si, Aizawl leh a chhehvelin nasa taka an tuar chu khatih laia Star Farm-in state pawn aṭanga vawk leh vawksa an lak luh vang nia an lo rinhlelh ṭhin chu, tunah chuan tihchianin a awm taa an ngaih thu an tarlang bawk.

MIPFA chuan, Star Farm leh a neitu Malsawmi ten Mizoramah vawk an vulh lo tih tarlangin, "State pawn aṭangin vawk talh tur an la lut. Heng mi tlem tê vanga Mizoram pumin ASF vanga harsatna nasa tak kan tawk hi pawi kan ti hle a ni," an ti.