Lungleiah ruihhlo do sawiho a ni

Nimin tlai khan Lunglei DC conference hall-ah Home minister K Sapdanga hoin ruihhlo do chungchang sawiho a ni.

Ṭhutkhawmah hian Social Welfare minister Lalrinpuii, Excise & Narcotics minister Lalnghinglova Hmar, minister of state B Lalchhanzova, Lunglei West bialtu MLA T Lalhlimpuia, LMC chairman Lalzuithanga Khiangte, DIG (Southern Range) C Lalthanmmawia, Lunglei SP J Lalmuankima, Excise commissioner Z Lalhmangaiha leh assistant commissioner Peter Zohmingthanga, Lungleia khawtlang hruaitute leh kohhran hruaitute an tel.

Home Minister chuan, Lunglei chu sorkarin a vei thu sawiin, "Ruihhlo chungchang, dan kenkawh leh mipui himna chunghangah theihtawp chhuah kan duh. Sorkar chuan Lunglei khawpui tan theihtawp a chhuah zel dawn a ni," a ti.

Social Welfare Minister chuan, Chief Minister aṭangin sorkarin ruihhlo do beihpui a thlak thu sawiin, "Excise Minister hian a vei em em a, vawi eng emaw zat kan inhmu khawm tawh. Lunglei bik pawh kan vei a, kan thawhho a ngai," a ti a, tlawmngai pawl leh kohhran hruaitute thawhpuiah a sáwm.

Excise & Narcotics minister Lalnghinglova Hmar chuan, thil hrilh tura Lunglei pan an nih loh thu sawiin, "In harsatna ngaithla tur leh, in rawtna ngaithla turin kan lo kal a ni. Lunglei harsatna hi Aizawl aṭangin kan hre vek lo a, a hmuna rawn ngaihthlak kan duh a, theihtawp i chhuah ho ang u," a ti.

Minister B Lalchhanzova pawhin thu sawiin, "Ka department chan ni lo mah se, social worker ka nihna angin vawiinah hian ka sawi ve duh. Ruihhlo avanga kan tawrhna a nasat tawh em avangin i ṭang tak tak ang u. Ruihhlo ti thar an tam hian min tilungngai," a ti a, a thawhpuite ṭhahnemngaihna a ṭawmpui thu a sawi.