Speaker-in thlai/thei sawngbawlna a tlawh

Assembly speaker Lalbiakzama leh adviser to chief minister (Hand Holding Policy) Dr KC Lalmalsawmzauva te chuan nimin khan Sairanga Horticulture Centre leh Khamranga Zoram Mega Food Park an tlawh.

Speaker chuan, kut hnathawktute tan sorkarin hma a lak mek thu sawiin, "Thlai leh thei tharte lo dawnsawn leh a deh ral kawngah theihtawpin sorkar a inbuatsaih a, thlai a nihna ang anga hralh chhàwn vek rem lote sawngbawl dan kawngte a awm em tih zir mek zel a ni," a ti.

Thlai sawngbawlna atan sorkar hmun­hma awm sa Sairang Horticulture Centre leh Khamrang Zoram Mega Food Park chu ṭangkai taka hman theih dan kawng zawn a ṭul thu Speaker chuan a sawi bawk.

Dr KC Lalmalsawmzauva chuan, Hand-Holding Policy kaltlangin kawng tam takah mipui dàwmkànna tur ruahmanna awm mah se, thlaite hlâwk taka suma chantir chu thil ṭul hmasa a nih thu a sawi.

Sorkar thuchhuah tarlan danin, Sairang Horticulture Centre leh Kham­rang Zoram Mega Food Park tlawhnaah hian thlai lei, lak khawm, dahṭhat leh sawngbawl chungchanga ruahmanna awm theite sawiho a ni.