Mizoramah kum 2015-16 chhungin Kawlphetha 593.91 MU hmang

Kum 2015-16 chhung khan Mizoramah kawlphetha million unit 593.91 hman a ni. Mizoramin kawlphetha a neih aṭangin million unit 83.5 chu hmun dangah hralh niin, chuta ṭang chuan cheng nuai 1,902.02 hmuh a ni.

Power & Electricity department hotute'n an sawi danin, kum 2015-16 chhunga Mizoramin kawlphetha a hman zawng zawng million unit 593.91 zinga million unit 565.55 chu state pawn aṭanga lak luh a ni a, million unit 28.36 chu Mizorama siam chhuah a ni.

Ruahtui tam lai chuan Mizoram chhungah kawlphetha megawatt 10-15 vel siam chhuah a ni ṭhin a, kum 2012-2016 chhung khan Mizoramah million unit 174.91 siam chhuah niin, chu chu cheng nuai 6,398.65 hu a ni.

Mizoram pumah electric power consumer 2,15,680 an awm a, Mizoramin kawlphetha a mamawh zat chu hman nasat lai ber (peak hour)-ah megawatt 100 vel a ni a, hman tlem lai ber (off peak)-ah chuan megawatt 45-50 vel a ni thung.

Mizoramin India hmarchhak chhungah Central power project hrang hrang aṭangin share a nei a, chumi tlingkhawm chu a tam lai berin megawatt 118 vel a ni ṭhin. Ruahtui tlem lai, ṭhál lai erawh chuan megawatt 50-60 vel a ni tlangpui.

Mizoramin hmarchhak biala kawlphetha chanpual a neihte chu hman tlem lai, zan rei tawh hnu
aṭanga zing lam thlengin mamawh aia tam a ni a, mamawh aia tam a neih hun chhunga mite chu hman loha a liam mai mai loh nan hmun dangah power exchange kaltlangin an hralh ṭhin.

Power trading aṭang hian kum 2015-16 chhung khan million unit 83.5 hralh niin, chuta ṭang chuan P&E department chuan cheng nuai 1902.02 a hmu a ni.

P&E department hotute chuan, fûr laiin Mizoramin kawlphetha a duhkhawp a hmuh theih laiin,
ṭhálah erawh chuan duhkhawp a hmu thei lo a, indaih lohna pawh megawatt 10-20 velte a ni ṭhin tih an sawi a; "Mizoramin a power share a tlem chang pawhin a ṭul danin mipui harsatna phuhru turin man to zawka lei cháng pawh a nei. State ṭhenawmte leh state dangte nena tehkhinin, Mizoram hi power supply nei ṭha ber pawl a ni," an ti.

P&E hotute sawi danin, Mizo-ram hian hydro electric power project a neih tawh zinga pariat chuan tun dinhmunah kawlphetha an siam chhuak thei a; chungte chu Kau-Tlabung HEP, Maicham-I HEP, Maicham-II HEP, Khawiva HEP, Serlui-A HEP, Tuipui HEP, Serlui-B SHP leh Lamsiam SHP-te a ni.

Hydel project hlui, tuna hman theih loh thawm ṭhat mek pahnih a awm a; chungte chu Tuirivang (0.3 MW) leh Tuipanglui (3 MW)-te a ni.

Hydel project thar - Kawlbem SHP (3.5 MW), Tlawva SHP (5 MW), Tuiriza (0.1 MW) leh Tuiching (0.1 MW)-te thawh mek a ni bawk.

Mizorama HEP hman mekte

Project Power

pek zat

1. Kautlabung HEP 3 MW

2. Maicham-I HEP 2 MW

3. Maicham-II HEP 3 MW

4. Khawiva HEP 1.05 MW

5. Serlui-A 1 MW

6. Tuipui HEP 0.5 MW

7. Serlui-B SHP 12 MW

8. Lamsial SHP 0.5 MW