Silai hralh leh zuar turte Dan zâwm turin hriattir

Home department chuan thuchhuah siamin, silai zawrh leh lei danah dan fel tak a awm thu an tarlang a, "Dan loa silai zawrh leh lei hi khap tlat a ni. Dan loa silai lei leh zuar lo puitu chu na taka hrem theih an ni," an ti.

Home department tarlan danin, miin arm licence hmanga silai a neih chu mi dang arm licence nei hnenah chauh hralh theih a ni a, licence nei lo hnena silai hralh chu dan kalh a ni.

Arm licence chu mimal hnenah danin a phût anga tlingte hnenah chauh pek ṭhin a ni a, hralh chhâwn theih a ni lo. Miin a arm licence leh chumi hmanga a kawl silai chu hralh phal a ni lo.

Mi ṭhenkhatin an arm licence leh chumi hmanga silai an neih chu a rualin an hralh ṭhin a, a leituin dâwt phuahchawpin retainer licence an siamtir leh ṭhin tih hriat a ni a, chutiang tite chu man an nih chuan na taka hrem theih an ni. Retainer licence chu Aarms Rule hnuaia a inziah ang chuan, arm licence neitu chhung hnai te, aiawhte leh a mi chhawrte hnenah chauh pek theih a ni.