Mizoramin biotechnology lama Hma a sawn theih dan tur sawiho

Sorkar laipui hnuaia Department of Biotechnology leh Directorate of Science & Technology ṭangkawp chuan, nimin khan Secretariat conference hall-ah biotechnology lama hmalakna leh ruahmannate sawihona, 'High level discussion on Biotechnology initiatives in Mizoram' an buatsaih a, chief minister Lal Thanhawla'n a hmanpui.

Chief Minister chuan, science lamah Mizoramin hmalakna tur a ngah tih sawiin, "Biotechnology leh kawng hrang hranga a hman ṭangkai dan, a bik takin agriculture leh industry lamah kan hmelhriat chho mek a, he thilah hian hmabak kan ngah hle. Biotechnology lama hmasawnna hi kan university leh zirna sang zawk tan chona lian tak a ni," a ti.

Lal Thanhawla chuan, sorkar policy thar, NEDP-ah biotechnology thiamna hmanga siam chhuah tihpun leh ramngaw, buh leh bâl, thei leh thlai hausakna ṭangkai leh hlâwk zawka hman leh sawngbawlin dinhmun pawimawh tak a neih theih thu a sawi.

CM Hawla chuan biotechnology-a hmasawnna leh thiamnate engtin nge Mizoramin kan ṭangkaipui ang tih ngaihtuahna hmanga mithiamte intawhkhawmna, a vawikhatna atana buatsaih a ni chu lawmawm a tih thu sawiin, " Mizoram tan hmasawnna a thlen ngei ka ring tlat," a ti.

Sawihona hawnna hi Planning secretary Dr. C Vanlalramsanga'n kaihruaiin, Rajya Sabha MP CL Ruala, parliamentary secretary KS Thanga leh State Planning Board vice chairman H Liansailova te pawhin thu an sawi. Meeting zawhah chhawng hnihin mithiamte'n biotechnology chungchang puanzarna leh thlirhona an nei nghal.

Session khatnaah Directorate of Science & Technology, Horticulture department, College of Veterinary Sciences & Animal Husbandry, Agriculture department leh Environment, Forests & Climate Change department leh Fisheries department-a mithiam ten biotechnology chungchang, a dinhmun leh hmalakna tur duante a lem nen an sawifiah.

Session hnihnaah Pachhunga University College-a Department of Biotechnology leh Department of Botany, Mizoram University-a Department of Biotechnology, AH&Vety department, Industries department, ICAR Kolasib leh Hospital & Medical Education department-a mithiamte'n an dinhmun leh hmalaknate tur an duante an sawifiah a ni.