Ṭhalaite'n ZNP policy an ngaihven: Duhoma

ZNP president Lalduhoma chuan, ZNP policy chu Mizo ṭhalaite'n an ngaihven hle niin a sawi a; ZNP-a awm tawh ṭhin, an party chhuahsan tawhte chu ZNP-a lut leh vek turin a sáwm.

Lalduhoma hian nimin-a ZNP pisaa inkhawmah thu sawiin, ZNP a sorkar chuan bul
ṭanna atan puih tlakte chu loan pek an nih tur thu a sawi a, "Handholding policy hmangin an bánah kâiin, mahni kea ding thei turin puih an ni ang. Sor-kar chu guarantor-ah a ṭang ang a, Mizoram Ceiling on Government Guarantees Act, 2011 hi nuai bo a ni ang a, a aiah Central scheme awm sa, Credit Guarantors Scheme hman a ni ang,” a ti.

ZNP President chuan, an sorkar chuan zirlaite’n sumdawn an thiam theih nan sikul leh college-ah enterpreneurship course zir a nih tur thu a sawi a; UPSC hnuaia competitive examination-a prelimi-nary kaltlangte hnenah ṭanpuina Rs. 1,00,000 zel pek a nih tur thu te, zirlai board exam beitute'n kawlphetha awm loh chánga an hman atan a thlawnin solar lantern pek an nih tur thute a sawi bawk.

ZNP aṭanga chhuak tawh zingah an party-a lut leh ta a awm mek zel nia sawiin Lalduhoma chuan, "Tun hnaiah ṭhalai lehkhathiamte'n ZNP an bawh a, lawm luh tur chatlak miah loa kan nei thei hi a lawmawm hle a ni,” a ti a; ZNP chhuahsan tawhte chu ZNP-a lut leh vek turin a sáwm a ni.

ZNP thuchhuah chuan, nimina an inkhawmah hian MNYF general headquarters-a secretary Ramchullova chu an party-ah an lawm lut niin an tarlang.