Mizo Carbon Products - Sorkar mualphonaah ngai

MNF general secretary Lalruatkima, MLA chuan, Congress sorkar hnuaiah ram leilung fate'n a taka industry an din aṭanga Central Transport Subsidy (CST) an hmuh hleih theih loh lai a, hnam dangin Mizorama industry an din, Mizo Carbon Products, Industrial Growth Centre-in cheng vaibelchhe tél CST an rût chu sorkar mualphona leh hlemhletna rapthlak tak a nih thu a sawi.

Nimina Mizo Hnam Rûna inkhawmah thu sawiin Lalruatkima chuan, "Public Investment Board-in industry din tura ram a pek, a nihna tur anga hman si loh leh sum siamna atan chauha hman Mizo Carbon Products hi a rang thei ang berin an registration leh ram hmantir hi sorkar-in a cancel ngei turah ka ngai,” a ti.

Lalruatkima chuan, Mizo Carbon Products chungchangah Assembly session-ah ṭum hnih zawhna a siam tawh thu leh industry chu a lem a nih avangin titawp tura hma a lak tawh thu a sawi a, "Industry Minister-in show cause notice pein an hmalak dan sawi mah se, a kaikuang ber industry lem hmuhchhuah kawngah hmalak tum tak takna a neih si loh avangin, Central YMA a pên chhuah a ngai ta hi a lungchhiatthlak," a ti a; corrution chungchangah mipuiin sorkar an phoro mek niin a sawi.

Lalruatkima chuan, police battalion zing-ah 1st. MAP chiahin zu zawrh phalna an nei chungin police batallion zawng zawngah dân loin zu an zuar vek niin a sawi a, "Police batallion-a zu zawrh hlâwknate hi sorkar revenue-a lut loin, police welfare fund-ah a luh thu Excise Minister-in a sawi a. Hei hi sorkar kalphung bawhchhiatna a ni," a ti.