Lungleiah Council of Minister ṭhukhawm: Tuialhtheia VAT lak zat tihpun a ni; Corporator/councillor hlawh a pung dawn

Council of Minister chu nimin khan Lungleiah an ṭhukhawm a, tuialtheia value added tax (VAT) lak zat tihpun leh corporation leh councillor-te hlawh tihpun rawtna an pawm. Tun ṭum hi Mizoram state sorkara Aizawl páwn lama Council of Minister ṭhutkhawm vawi khatna a ni.

Ṭhutkhawm hi Lunglei district High Powered Committee pisa conference hall-ah neih a ni a; chief minister Lalduhoma chuan Lungleia an ṭhutkhawm chhan sawiin, "Lunglei mipui lakah tha bá kan ngah hle. Kan sorkar chuan he khawpui hi kan ngaihthah dawn lohzia tihlanna hmasa atan Council of Minister meeting kan nghat a ni," a ti.

Council of Minister ṭhut­khawm­ah hian a tirah agenda 13 awm mah se, pakhat hnuh lêt (with­­draw) a nih avangin agenda 12 ngaih­­tuah a ni a; hriat theih chin­ah agenda paruk an pawm.

Taxation department aṭanga lut, 'Proposal for Amendment of VAT Rate on Motor Spirit (Petrol) and High Speed Diesel Oil (Diesel)' chu sawiho a nih hnuah pawm a ni. Thu dawn danin, tuialhtheia VAT lak tur punna chu 2% a ni a, litre khatah Rs 2 tling lo deuhin tuialhthei man a pung dawn.

UDPA department aṭanga lut, 'Proposal to Review the Remuneration of the Mayor, Deputy Mayor, Chairman, Vice Chairman, Executive Corporators, Corporators, Executive Councillors and Councillors' pawh Council of Minister chuan an pawm.

Aizawl Municipal Corporation (AMC) leh Lunglei Municipal Council (LMC) chuan hlawh tihsan an rawt ve ve a, Council of Minister chuan rawtnate an thlirho hnuah hlawh tihsan an pawm a ni. Hetih lai hian, AMC leh LMC duh dan ang diak diak chuan pawm a ni lo thung.

Hlawh thar tur AMC - mayor Rs 78,000, dy. mayor Rs 72,000, executive corporator Rs 55,000 leh corporator Rs 50,000; LMC - chairman Rs 74,400, vice chairman Rs 68,400, exe­cutive councillor Rs 52,000 leh councillor Rs 47,000 a ni.

COUNCIL OF MINISTER PAWM DANG

▶ Proposal for Introduction of the Mizoram Banning of Unregulated Deposits Scheme Rules, 2024 - Finance department (Dan hnuai ni loa sum dah (deposit) khapna tur)

▶ The Draft Mizoram Ground Water (Control & Regulation) Rules, 2024 - PHE department

▶ Proposal for Amendment of the Mizoram Water Supplies (Control) Rules, 2023 - PHE department

▶ The Mizoram Wood Based Industries (Establishment & Regulation) (Amendment) Rules, 2024 - EFCC department