Zuangtuiah leiminin in pali a hnâwl

Nimin zing dar 5:30 vel khan Zuangtuiah leiminin in pali a hnâwl a, thi leh hliam an awm lo.

Zuangtui aṭanga Vanglaini thu dawn danin, leiminin in a hnawl zinga pakhatah chhungkaw pathum an chêng a, in dang pathumah chhungkaw pakhat ṭheuh an khawsa. Chhungkaw paruk zinga panga chu an dinhmun him loa an hriat avangin leimin hmain an riak chhuak.

In chhia zinga a mawng bera awm chhungkaw pakhat (mi pasarih) erawh chu an riak chhuak lo a; leiminin an in a hnâwl ṭan tirhah tukverh aṭangin an zuang chhuak vek a, hliam na awm loin an insaseng thei.

Leiminin in a hnâwlna hmunhmate chu nimin khan a theih ang anga senghawi a ni a, vawiinah senghawi chhunzawm a ni ang. In chánte awmna tur khawtlang hruaitute'n an ngaihtuah a, nimin tlai thleng kha chuan an la tifel hman lo.

Zuangtuia leimin avang hian a bul hnaia in dang pangaa chhungkaw 12 chu an bungrua thiar chhuah a ni bawk.