Leiminin mi pathum a delh hlum

Nimin zing dar 6 vel khan Zemabawk High School Vengah leiminin F Lalrokima in chhak lam a chhilh a, mi pathum chhilh hnanin, chawhma dar 10:30 velah an ruang lak chhuah kim a ni.

Thu dawn danin, leimin lai hian F Lalrokima te inah mi pasarih an awm a, leimin hian Isak Chhangte (32) s/o F Lalrokima, Isaka nupui Lalrinthari (25) leh an fanu Abigail Lalchhanhimi (4)-te mut pindan a chhilh a, midangte erawh an insaseng hman.

YMA - Zemabawk, Zemabawk North leh Zemabawk West branch member te, State Disaster Response Force leh Quick Response Team-ten leiminin a chhilhte an zawng nghal a, chawhma dar 10:30 velah an pathum­in thiin hmuh an ni.

Isak Chhangte, Lalrinthari leh Abigail Lalchhanhimi te ruang hi Zemabawk Seventh-Day Adventist biak-inah lak a ni a, nizan khan lumen niin, vawiin chhun dar 12-ah vui an ni ang.

F Lalrokima te in hi leiminin a chhilh vek lo a, kawmchár bang leh a chung a tichhia a, luah zui chi a nih loh avangin nimin vek khan hnatlangte'n bungrua an thiar chhuak.

Lalrokimate chhungkaw awm lailâwkna tur chu an fate vawiina vui zawh lamah ngaihtuah a nih tur thu Zemabawk YMA hruaitute chuan an sawi.