MADC by-election-ah BJP chak

Mara Autonomous District Council (MADC) Chakhei biala Member of District Council (MDC) by-election June 28, 2024-a neiha vote tlate chu nimin khan Siahaa DRDO Conference Room-ah chhiar a ni a; BJP candidate Albert TT Sachu thlan tlin a ni.

MDC by-election-ah hian vote 1,592 a tla a; thlan tlin tâk Albert TT Sachu chuan vote 733 a hmu a, vote 690 hmua amah hnaih bertu ZPM candidate T Essa chu vote 43-in a hneh. MNF candidate KC Ngobei-in vote 167 a hmu a, NOTA-ah vote 2 a tla bawk.

Vote chhiar hi returning officer VL Hruaizela Khiangte, Siaha district election officer kaihhruaiin neih a ni a; RO chuan Albert TT Sachu chu MDC atan thlan tlin a ni tih puangin, thlan tlin a nihna certificate a hlan. Chakhei bialah hian voter 1,875 (mipa 916 leh hmeichhia 959) a awm a, mi 1,592 (84.91%)-in vote an thlak a ni.