Dan ang thlapin kan kal - Star Farm
Star Farm neitu Malsawmi chuan nimin khan Aizawl Press Club-ah thuthar thehdarhtute a kâwm a, Mizoram pawn aṭanga vawk leh vawksa an lak luhah dan ang thlapa an kal thu a sawi. Mizoram páwn aṭanga vawk leh vawksa lâk luh chu Mizoram sorkarin a khap theih a ni lo niin a sawi bawk.
Malsawmi chuan, Mizoram Pig Farmer Association (MIPFA)-in frozen vawksa chu African Swine Fever (ASF) tidarhtu tiin dâwt an phuahchawp niin a sawi a, "Kan slaughter house-ahte lutin, thuthar thehdarhtute an kâwm a ni. Hei hi duhtâwk loin frozen vawksate hâlin, frozen vawksa chu sa tenawm angin an aupui a ni," a ti.
June 12, 2024 khan AH&Vety Minister thupekin an vawksate sample la turin vety doctor-te Bung Banglaa Slaughter House-ah an kal thu sawiin Malsawmi chuan, "A kawchhung za tél awm khawm aṭangin sample 10 an thlang a, random test an ti a ni," a ti a, hmanhmawh taka sample an lak laiin, test result a chhuah theih lawk loh thu a sawi.
Malsawmi chuan, an vawksa sample chu a negative vek anga sawi a awm thu a hria nia sawiin, "Official result chu June 18, 2024 tlai dar 4:40-ah kan hmu a, doubtful (rinhlelhawm) a intih bakah, re-test tur a inti. Re-test result-ah paruk a negative a, pali doubtful a in ti a ni. Hetiang a nih avang hian AH&Vety Minister hnenah state dangah test tir leh ka rawt a, ani pawhin a result chu an pawm tur thuin min chháng," a ti.
Malsawmi sawi danin, vety doctor-te'n hming an ziah hnan ngei sample pali chu vawiin (July 3) hian phai lama endik leh tura thawn a ni dawn.
Finfiahna awm loin frozen vawksa chu ASF thehdarhtu angin MIFPA-te'n an tarlan thu sawiin Malsawmi chuan, "GST chawi thlapa kan sumdawnna khâr turin min ti a, kan sa talhna hmunah an lut ru a, sa hrang pakhat pawh hmu loin social media-a kan sate an sawichhia a, hei hi dan kalh a ni," a ti.
Malsawmi chuan, dan ang thlapin sumdawnna an kalpui niin a sawi a, "Frozen food lak luh phalna pawh kan nei. State dang aṭanga vawk/vawksa lak luh hi state sorkar thuneihna a ni lo a, India sorkar aṭanga phalna lâk tur a nih angin kan nei thlap. Fair takin sumdawnnaah chuan kan inel mai tur a ni," a ti a; MIPFA-te chêt dan chu kutkawih eizawnna kalpuitu (enterpreneur)-te dodalna a nih thu a sawi.
Zawhna chhangin Malsawmi chuan, Mizoram pawn aṭanga vawk leh vawksa lâk luh chu Mizoram sorkarin a khap theih a nih loh thu leh, district magistrate ṭhenkhatte'n vawk/vawksa lak luh khapna thupek an chhuah chu an thuneihna a nih loh thu a sawi a; state pawn aṭangin vawk/vawksa la lak luh reng a nih thu a sawi bawk.