Minister-in Lungleia officer-te a kâwm

Minister C Lalsawivunga chuan July 1-2, 2024 khan Lungleia a department chan pisate leh hmunhmate a tlawh a, thawktute nen an inkâwm.

C Lalsawivunga chuan, sorkar hnathawkte an intuaithar fo a ngai tih sawiin, "Eizawn nan mai ni lo, ram leh hnam tana mi ṭangkai leh innghahna kan nih avangin kan inthlahdah a thiang lo. Rinawm taka hnathawh hi Pathian duh zawng a ni a, sorkar hnathawh hi eizawnna mai ni loin Pathian rawngbawlna a ni tih hi kan hriat reng ka duh," a ti a; mipui tan dawr nuam ni tur leh dawrtute phûr taka lo pui ṭhin turin thawktute a chah.

Department a chante chu ṭha taka enkawl a, ram leh hnam nghahfak ni tura enkawl a intiam tih sawiin C Lalsawivunga chuan, "Pathianin min kaihruai zel niin ka hria a, thawhpui ṭha tak tak hmun hrang hrangah an lo awm hi ka lawm hle," a ti.

C Lalsawivunga chuan department a enkawlte chungchang sawiin, AH&Vety department kaltlangin mipui tan hma an lak zel dawn thu te, Mizo hnam ziaráng leh nunphungte vawn nun zel a nih theih nan Art & Culture department tihchangtlun zel an tum thu te, LAD pawhin theih­tawp an chhuah mek thute a sawi bawk.