Haulawng PHC & Chawlhmun UPHC Sorkar damdawi-in ṭha zingah an tling

India rama sorkar damdawi-in ṭha bik thlan zingah Haulawng Primary Health Centre leh Chawlhhmun Urban Primary Health Centre-te a tel.

National Health Mission, Mizoram aṭanga thu dawn danin, India rama sorkar damdawi-in ṭha bik tehna National Quality Assurance Standard (NQAS)-ah Haulawng PHC leh Chawlhmun UPHC-te chu an tling a ni. A hmain Aizawl Civil Hospital, Aibawk PHC, Thingsulthliah PHC leh ITI Veng UPHC-te an lo tling tawh bawk.

NQAS-a tling tur hian state level leh national level aṭangin tehna hrang hrang paltlang a ngai a; tehnaah hian Haulawng PHC-in 90.6% hmuin Premium-ah an tling a, Chawlhhmun UPHC-in 87.9% an hmu thung.

NHM mission director Dr Eric Zomawia chuan, India rama damdawi-in ṭha bik thlan chhuah zingah Mizorama damdawi-in an awm belh zel chu Mizoram tan méllung pawimawh a nih thu a sawi a; thawktu zawng zawng thawhrimna leh taimakna chhuanawm a tih thu a sawi bawk.