Kohhran enkawl zirna-in thawhpuia ṭanpui dan tur kan dap dawn - CM

Chief minister Lalduhoma chuan nimin khan Lunglei Serkawna Baptist Church of Mizoram hmunpui a tlawh a, ṭawngṭai inkhawm a hmanpui. CM chuan, "Kohhran enkawl zirna-inte thawhpuia ṭanpui dan tur kan dap dawn," a ti.

BCM hall-a ṭawngṭai rualna hun hman zawhah CM Lalduhoma chuan thu sawiin, "Sorkar enkawl zirna-inte aia kohhran enkawl zirna-inte kawng tam takah an ṭhat zawk avangin kohhran enkawl zirna-inte hi thawhpuia ṭanpui dan tur kan dap chho dawn," a ti a; ruihhlo ngaite enkawlna leh ruihhlo donaah kohhrante nen thawhhona ṭha zawk neih zel ṭha a tih thu a sawi.

Chief Minister chuan, ZPM auhla ber chu Mizoramah Pathian ram lo thleng se tih a nih thu sawiin, "Kan policy pawimawh bik pasarih zinga a hmasa berah hei hi kan dah ṭhin. Ram hmasawnna hna thawk turin sorkar, kohhran leh tlawmngai pawlte kan pawimawh," a ti. BCM-in thlarau lam rawngbawlna bakah zirna, fahrah enkawlna, ruihhlo ngaite enkawlna leh thiamthil tihhmasawnna lama hma an laknate ropui a tih thu a sawi bawk.

Ṭawngṭai inkhawm hi BCM general secretary Rev. R Lalbiakliana'n a kaihruai a, assistant general secretary Rev. R Lalnunzira'n BCM kohhranin sorkar a beisei dan leh a duhsakna te a sawi.

Inkhawmah hian Home minister K Sapdanga bakah minister dang panga - Vanlalhlana, Lalrinpuii, Lalthansanga, B Lalchhanzova leh Lalnghinglova Hmar te, MLA pathum - V Malsawmtluanga, T Lalhlimpuia leh Lalramliana Papuia te an tel a ni.