Party-te'n chhiatna thleng pawi an ti

Political party hrang hrangte chuan thuchhuah siamin, tun hnaia ruahsur nasa vanga chhiatna a thleng leh thih phah an awm chu pawi an tih thu an tarlang.

ZPM Ṭhalai chuan, ruahsur nasain chhiatna hrang hrang a thlen vanga thi an awm chu pawi an tih thu leh chhiatna tuartute an tawrhpui thu an tarlang a, "An chhung leh khat, ṭhenrual ṭhate Pathian thlamuannain a awmpui kan duhin kan ṭawngṭaipui a ni. Chhiatna thleng vanga in chhia bakah, in hmun, huan lo ram chân an awm hi kan tawrhpui tak zet," an ti.

ZPM ṭhalaite chuan, khuarel chhiatna thleng karah mihringin a siam chawp vanga harsatna a awm ṭhin chu pawi an tih thu an tarlang a; ram leh hnam, khawtlang enkawlnaah mawhphurtute'n an thuneihna zâwnah dan leh thupek kenkawh chungchangah ṭan lak a ngaihzia a lang chiang hlea an ngaih thu an tarlang bawk.

ZPM Aizawl East-I Block chuan, Zemabawka leiminin in a delha thi mi pathum - lsaac Chhangte (32) leh a nupui Lalrinthari (25) leh an fanu Abigail Lalchhanhimi (4)-te chu Block hruaitute'n puana an tuam thu an tarlang a; lei khi leh min vangin Zuangtuia chhungkaw 16, Falkland Venga chhungkaw 15 leh Sihphira chhungkaw pakhat an inthiar chhuak tih sawiin, bialtu MLA aiawhin Block hruaitute'n YMA-te hnenah tarpauline leh pawisa an hlan thu an sawi.

MNYF chuan, Zemabawka leiminin in a delh vanga Isaac Chhangte leh a nupui leh an fanu an thi chu pawi an ti a, an tawrhpui thu an tarlang.

MNYF chuan, Zemabawka mi pathum thihna hmun chu nimin khan MNF MLA pahnih - Lalchhamdama Ralte leh Robert Romawia Royte bakah, Aizawl mayor Lalrinenga Sailo leh deputy mayor R Thanglura bakah, AMC executive corporator B Lalawmpuii leh R Zonunsanga leh bialtu corporator Vanlalneiha ten an tlawh thu an tarlang a, "Ṭanpuina sum leh silpauline an pek hlawm avangin kan chhuang hle a ni," an ti.

BJP, Mizoram Pradesh pawhin, nimina Aizawl hmun ṭhenkhata chhiatna vanga thi leh in leh lo chánte an tawrhpui thu leh, BJP hruaitute'n chhiatna thlenna hmunte an tlawh a, khawtlang hruaitute hnenah tarpauline an pek thu an tarlang.

BJP chuan, Mizoram sorkarin chhiat tâwkte ṭanpuina leh thite râlna a pek theihte pe thuai turin sorkar an phût a; "Sorkarin vbc. 15 lai khuarel chhiatna atana a dah chu a taka hmang tur leh chhiat tâwkte beiseina tibo loa hmang nghal turin kan phût a ni," an ti.