Damdawi-in hotute'n HMIS an zirho

National Health Mission (NHM) chuan nimin khan NABARD Conference Hall, Aizawlah Health Management Information System (HMIS) chungchang zirhona an buatsaih a; Aizawla mimal damdawi-in 14 leh Kulikawn Sub-District Hospital aiawhte an tel.

Zirhona hi NHM mission director Dr Eric Zomawia'n a kaihruai a; HMIS chu national leh state level-ah Health and Family Welfare department hnuaia reporting system lian ber leh changtlung ber a nih thu leh, HMIS data-te chu ram leh mipui hriselna dinhmun hriat nan leh HFW department plan leh target siam nan hman ṭhin a nih thu a sawi.

Dr Eric Zomawia chuan, mimal damdawi-inte report tel lo chuan hriselna lam kaihhnawihah data dik tak a awm tgheih loh thu a sawi a, "Ministry of HFW pawhin private hospital zawng zawngte HMIS-ah report an pek ve theih nan hma la tura an beisei angin he hun hi buatsaih a ni," a ti.

Zirhonaa tarlan danin, Mizoramah district hospital 12, sub-district hospital pahnih, community health centre pakua, primary health centre 56, urban primary health centre pakua, private hospital 12, sub-centre 383 a awm mek. Block headquarters 28 leh district headquarters pakua aṭangin HMIS portal-ah healthcare service hrang hrang data thla tin dah ṭhin a ni.