Lungleia Cabinet Meeting neih thil ṭangkai loah MNF-in an ngai

MNF party chuan thu­chhuah siamin, Lungleia council of minister ṭhut­khawm neih chu thil ṭangkai loa an ngaih thu an tar­lang a; mipui mamawh anga khawsa tur­in sorkar an phût.

MNF chuan, fûrpui lai, chhiatna hrang hrangin Zoram dung leh vâng a tuam mek lai a nih thu sawiin, "Sorkar, inren­chem thupuia puanga kalpui mektute chuan a hautak thei ang berin Lunglei khawpui ngai pawimawh derin Cabinet meeting an neih chilh hi thil ṭangkai lo takah kan ngai. Rorelna hmun sawn aiin an thurel leh a taka ken­kawhnain Lunglei leh chhim lam tan hian thawk zawk se a duhawm hle a ni," an ti.

Khawchin thlirtute puan lâwk angin ni thum vel ruah a sûr nia sawiin MNF chuan, "Veng hrang hrangah chhiatna, leimin vanga in chim, nunna chán leh mangang au thâwm te, kawng kal tlang theih loh thâwmte'n min chîm. A hmaa inbuatsaihna awm thei reng karah naupang­te'n ruahsur kara sikul an pan vek tawh hnuah sikul chawlh an puang leh hnuhnawh bawk," an ti a, sorkarin July 2, 2024-a sikul chawlh a puan chu sikul tam takin an buaina tizualtuah an ngai niin an tarlang.

MNF chuan, rorelna fel lo hnuaia khawsak mipuite'n an beisei lo nia sawiin, "An insawi ang ni hauh loa 'A leh alinga vuttui thlawr bêl' anga khawsa sorkar kan nei hi pawi kan tiin, sorkar kan hrawn mek hian mipui bei a tidawng tak zet. Mipui sorkar din tumtute khawsak dan hi a lungchhiatthlak tak zet a ni. Mipui mamawh anga khawsa turin ZPM sorkar hi kan phût tak zet a ni," an ti.