AMC hotute'n chhiatna hmun an tlawh

Aizawl Municipal Corporation mayor Lalrinenga Sailo leh AMC hotu dangte chuan nimin khan ruahsur vanga tun hnaia Aizawla chhiatna thlengte an tlawh a, ṭanpuina an hlân.

AMC hotute hian Zuangtuia nimina leimin an tlawh a, khawtlang hruaitute hnenah tarlpauline bundle thum an hlân. Zemabawka leimin vanga mi pathum an thihna hmun an tlawhnaah tarpauline bundle hnih bakah, Mayor-in Rs 5,000, deputy mayor R Thanglura'n Rs 3,500 leh bialtu corporator Vanlalneia'n Rs 4,000 an pe.

AMC hotute hian Falkland Venga lei chêtna hmun leh Bawngkawna AMC Sports Complex-a leimin pawh an tlawh a; hetah hian executive corporator pathum - Lalringliana, B Lalawmpuii leh H Zonunsanga te pawh an tel. Falkland Veng khawtlang hruaitute hnenah a ṭula hman turin Rs 5,000 leh tarlpauline bundle khat an pe a ni.