KHAWTHLIR

Hlimen ṭanpui

Hlimena hmun him lo laia cheng chhungkua eng emaw zatte tana chenna tur in Hlimen khawtlangin an sak mek ṭanpuina atan Mizoram Cooperative Apex Bank (MCAB) chuan Hlimen Local Council hnenah nimin khan Rs 1,00,000 an pe. Hlimena relief camp sak mek hi MCAB chairman Lalnunsanga leh Cooperation department-a RCS R Lalremsanga te chuan nimin khan a hmunah an tlawh a ni.

Lawmthu sawi

MNF party chuan thuchhuah siamin, tun hnaiah LADC-a Lawngtlai Chandmary bial leh MADC-a Chakhei biala MDC by-election neiha MNF candidate-te vote-tu zawng zawng chungah an lawm thu an tarlang. "Lawngtlai Chandmary bial, ZPM Adviser to Chief Minister bial chhuhsaka MNF candidate Pu C Lalsawmzuala thlan tlin a ni hi mipuite'n ZPM sorkarah rinna an nghat ngam lo ni-ah kan ngai," an ti.

AMPEDA-in pawi ti

All Mizoram Petroleum Dealer's Association (AMPEDA) chuan thuchhuah siamin, tun hnaia Siaha district-a kal tur tuialhthei phur tank lorry-te Lawngtlai bula dan an ni chu pawi an ti a, ṭha lo an tih thu an tarlang. "Hetianga mipui mamawh (essential commodity) / explosive phurte kawng laka dan hi a him loin, ṭha kan ti lo a, thuneitute'n a rang lama hma min laksak a, petrol pump thlenga him taka min thlensak turin kan ngen a ni," an ti.

Ṭanpuina hlân

Formosa Foundation chuan khuarel chhiatna vanga in leh lo chán, luah zui ngam loh vanga Hlimen leh Melthuma in chhuahsantu chhungkaw 131 hnenah nimin khan hygiene pack an hlân. Hygiene pack-ah hian washing powder, sahbawn, hah nawhna leh ha-hlo, inziah faina leh coconut oil-te a tel a ni.

Minister-in tlawh

Land Revenue & Settlement minister B Lalchhanzova chuan July 1, Thawhṭanni khan Lungleia LRS department pisa a tlawh a; Settlement Officer pisaah public interview neiin, amah dawr duh mipui a kâwm. Minister hian District Civil Supply Officer office pawh a tlawh a, FCSCA department hmalak tum dante thawktute nen an sawiho a ni.