AR sawn chungchang sawiho a ni; Kawng sial mek endik thuai an rêl

Chief minister Lalduhoma hoin nimin khan CMO conference hall-ah minister, Assam Rifles leh Mizoram sorkar hotute'n Aizawl khawpui laili aṭanga Zokhawsanga Assam Rifles sawn chungchang an sawiho. Assam Rifles hmun paltlang ṭhin loneitute kawng thar sial vanga AR hmunhma ṭhenkhat sawn ngaite chu enfiah thuai an rêl.

CM Lalduhoma chuan, ZPM-in sorkarna an siam hnuah Assam Rifles sawn chhuah chungchang an la sawi chhuak lo tih sawiin, "Central sorkar rilru dik tak hriat kan duh avangin kan ngaichâng. June ni 20-a Union Home minister Pu Amit Shah ka kawm ṭumin amah zawkin a sawi chhuak," a ti.

Home minister Amit Shah chuan, "Aizawl khawpui laili aṭanga Zokhawsanga AR sawn chhuah hi thutlukna siam fel tawh sa a ni a, kan sawn ngei dawn a, hmalak tawh chinte enin August thlaah rawn zin ka tum a ni," tia a sawi thu Chief Minister chuan a sawi a; AR sawn chungchanga hmalak tawh chin leh hmabak awmte rang taka ûm zui a ngaih avangin ṭhutkhawm buatsaih a nih thu a sawi.

Ṭhutkhawmah hian department pali - Home, PWD, PHE leh Power & Electricity official-te'n an hmalak tawh chinte an sawi. Assam Rifles hotute chuan loneitute tana an ram paltlangna kawng thar laih a nih avangin an magazine building leh firing point hmunte sawn a ngaih phah tur thu an sawi a; kawng, tui leh electric transformer chhia chungchangte an sawi bawk.

Meeting-ah hian Home minister K Sapdanga, PWD minister Vanlalhlana, Power & Electricity minister F Rodingliana, PHE minister Prof. Lalnilawma, Assam Rifles inspector general (East) Maj. Gen. Suresh Kumar Bhambhu, 2 Assam Rifles commander Col. Mukesh Suhata leh a kaihhnawih sorkar department hotute an tel a ni.