Kuhva chingtute'n sorkar thuneitute nena an inremna bawhchhiat a ni-ah an ngai

Vairengte, Bilkhawthlir, Hachhek Bial Kuhva Chingtu Joint Committee chuan nimin khan thuchhuah siamin, Myanmar aṭanga dan loa lut nia sawi kuhva ip 9,635 chu kudam aṭangin a bo deuh vek niin an tarlang a, an hriatthiam loh thu leh, kuhva chingtute leh sorkar thuneitute inremna bawhchhiat a nih thu an tarlang.

Kuhva Chingtu Joint Committee tarlan danin, Vairengte leh a chhehvela kudam hrang hranga ram dang kuhva ip 9,635 awm chungchang chu July 1, 2024 khan Kolasib DC Conference Hall-ah bawrhsap John LT Sanga kaihhruainain sawiho a ni a; Kolasib SP David Lalthangliana, Vairengte SDO(C) leh SDPO te, Joint Committee aiawhte an tel.

Kudam hrang hranga ram dang kuhva awmte chu dah sawn tawh lo tur leh dan anga hmalak tur a nih thu Kolasib DC leh SP-in an sawi tih tarlangin Joint Committee chuan, "Hnatlang neih ngai loa thenfai thuai an tum thu leh hnatlang nei rih lo turin kuhva chíngtute min ngen a, July 5, 2024 thleng nghak tura min ngenna chu zahawm tiin, July 5 hnu lama hmalakna a awm loh chuan resolution kan pass tawh angin kuhva chingtute'n kalpui kan tum," an ti.

Kuhva Chingtu Joint Committee chuan, July 2-ah Vairengte SDPO/OC leh kuhva chingtu aiawhte'n kudama kuhva chhêk khawl sa a kim leh kim loh an enfiah tih sawiin, "Kuhva ro ip 5,741 lai chu lâk chhuah a ni tih hriat a ni," an ti a, kuhva ip 3,894 chiah a awm tawh thu an sawi.

MNF party chuan thuchhuah siamin, dan loa lak luh ram dang kuhva chungchangah Mizoram sorkarin kuhva chíngtute a bum niin a tarlang.
MNF tarlan danin, kuhva chingtu - Vairengte, Bilkhawthlir leh Hachhek bial joint committee-in Myanmar aṭanga kuhva tawlh rûkte chu Vairengte leh a chhehvel kudamah chhêk khâwl niin an hria a, chungte chu June 30,2024 ral hmaa then faisak turin sorkar ngenin, an ngennain awmzia a neih loh chuan kuhva then fai hnatlang neih an tum thu an puang.

July 1, 2024-a chhuak Vanglaini chanchinbuah Vairengte leh a chhehvela kudamte endik a nih thu leh chung kudamah chuan kuhva ip 9,635 a awm thu tarlan a ni a; July 1, 2024-a ZONET chanchin tharah pawh kudama kuhvate chu khawih chêt theih loh tura hrên nghal a nih thu puan a ni.

Kolasib DC kaihhruai ṭhutkhawmah sorkar official-te'n kuhva rah chu thenfai vat a nih dawn thu sawiin, hnatlang ko rih lo tur leh July 5, 2024 thleng nghak tura an ngenna chu Joint Committee chuan an pawm a; mahse, a hnuah kuhvate chu a bo zo deuh vek tawh nia an hriat avangin July 3, 2024 khan Kolasib SP-ah complaint an thehlut a ni.

MNF chuan, Joint Committee-in July 3-a Kolasib SP-a ngenna an thlen leh chuan kuhva khawih chêt tawh lo tura an hrên nghal lohzia a tichiang niin an sawi a, "Kuhva smuggling thla khat chhunga tihtawp tumtu Home Minister hian kuhva tawlh ru ṭhinte thurualpuiin kudama chhêk khawlte pawh a lak chhuahtir zawk nge," tiin, thu dik puang turin Home Minister an phût.

Sorkar chu kuhva chíngtute bumah puhin MNF chuan, "An harsatna sutkiansak nia an inhriat laia sorkarin a bum duh hi kut hnathawktute ngai pawimawh ber sorkar nia insawi tih atan a zahthlak hle. Hetianga inbumna hi thleng nawn tawh lo se kan duh tak zet a ni," an ti.