Hlawh, chhiah leh buhfai man tihpun duh loin Congress party pung khawm

Mizoram sorkarin chhiah, hlawh leh buhfai man a tihpun duh loin Congress party mite chu nimin khan Mizo­ram Youth Congress Com­mittee (MPYCC) bul­tumin Vanapa Hall kawtah an pung khawm a, thil chi hrang hrang tihpun a nihna an hâl bakah, ZPM kaihhruai sorkar kal­phung an duh lohna thu­ziakte an keng lang.

MPYCC senior vice president Ngurdingpuia Pachuau-in an thuchhuah a chhiar chhuak a; MPCC treasurer Dr Lalmalsawma Nghaka'n thu a sawi zawh­ah MPYCC president Laltawnliana'n hlawh, chhiah leh buhfai man tihpun a nihnate a hâl a ni.

July 2, 2024-a Lungleia Council of Minister ṭhu­khawmin petrol leh diesel-a vallue added tax (VAT) lak ṭhin 2%-a tihsan turin thutlukna an siam tih tarlangin MPYCC chuan, "Petrol leh diesel-a chhiah tihpun a ni tur hian nasa takin petrol leh diesel man a tihsan phah dawn a, lirtheia sumdawng mai ni lo, ni tin eizawnga hun hmangte nasa takin harsatna a siam dawn. Mirethei leh harsa zawkte khawsak a tiharsa zual dawn hle a ni," an ti.

MPYCC chuan, ZPM sorkarin buhfai an leina aia toin mipui leitir a tum nia tarlangin, "Buhfai supplier hnen aṭangin kg. khat zelah Rs 27.50-a an lei laiin, mipuiin kg. khat Rs 30-in kan lei dawn. ZPM sorkar kal dan hian welfare state ni tawh loin an sahmîm ham puarna tura sumdawng sorkar kan hrawn mek a ni tih a chiang," an ti a, kalphung thar sorkarin mipui phur a tizângkhai ve lo niin an tarlang.

MPYCC chuan, ZPM sorkarin ram sum dinhmun ngaihtuah miah loa AMC leh LMC-a corporator leh councillor-te hlawh sang takin a tipung tih tarlangin, "Inrenchem sawi mawi chunga mipui palzûtnaah kan ngai. Petrol leh diesel chhiah a tihsan a, buhfai man a tih to vak vak laiin an duhsak zawngte vulh nan erawh mipui sum nasa takin an sêng leh si hian ZPM sorkar rintlak lohzia leh ram mipui an pawisak lohzia a tichiang," an ti.

Insiamṭhatna khawmpui hming vuaha August 16, 2018-a Vanapa Hall-a ZPM-in inkhawmpui an hman ṭumin K Sapdanga'n, ṭangrual pawl a sorkar chuan Mizorama pung chak ber tur chu tuthlawh chherna pûm a nih tur thu a sawi nia tarlangin MPYCC chuan, "Phai chak ber tur pawh Aizawl population a ni tih a sawi," an ti a; ZPM sorkara pung nasa ber chu chhiah leh an duhsak zawngte hlawh niin an tarlang.

MPYCC chuan, sorkar kal ta MNF sorkarah electric, tui, petrol leh diesel man nasa taka tihsan a nih thu tarlangin, "Heng chhiah hrang hrang aṭang hian cheng vbc. 126 (chhiah) vel mipui sawr fêin an la. Tunah ZPM-in chhiah an tihpun loh tur thu leh pawisa pûk lo tura inzuar chungin cheng vbc. 1,789 zet thla sarih pawh tling loah pawisa an pûk tawh. MNF leh ZPM sorkar hi danglamna a awm lo," an ti.