Khawpui bawlhhlawh sawngbawlna atan thawhhona thuthlung ziah a ni

Urban Development & Poverty Alleviation (UDPA) minister K Sapdanga hoin nimin khan a pisaah UDPA department hnuaia office hrang hrangte hmalakhona tur 'Comprehensive Plan for Municipal Waste Management in Aizawl' atan thawhhona thuthlung ziah a ni.

Thawhhona thuthlung hi UDPA Directorate, Aizawl Municipal Corporation leh Aizawl Smart City Limited-te'n an ziak. Department/agency pathumte hi Aizawl bawlhhlawh sawngbawl chungchangah an thawkho dawn a; a tum ber chu - sorkar department mai bakah private entity leh mipui mimir ṭanhona hmanga Aizawl khawpui chu India ram khaw fai ber zinga siam a ni.

Thuthlungah hian UDPA minister K Sapdanga, AMC mayor Lalrinenga Sailo, UDPA secretary Lalmalsawma Pachuau, AMC commissioner Lalhriatpuia, UDPA director Dr Andrew H Vanlaldika leh Aizawl Smart City chief executive officer CC Lalchhuangkima ten hming an ziak.