Sorkarin Hlimen hnenah sum a hlan

Mizoram sorkar chuan Hlimen khawtlangin an veng mi, an in a him loh vanga insawn chhuakte awmna tur in (relief camp) an sakna senso chu Hlimen khawtlang hruaitute hnenah nimin khan a hlan.

Mizoram sorkar aiawhin Aizawl bawrhsap Lalhriatpuia chuan Hlimen khawtlang hruaitute hnenah Rs 12,68,000 a hlan a, relief camp an sakna hmunte a en nghal. Hlimen khawtlang hian in pahnih, chhungkaw 10 ve ve awmna tur an sa zo tawh a; nimina Mizoram sorkarin pawisa a pek hi in pakhat zawk an sakna senso a ni.

In pakhat zawk sakna atana an sum hman dan (utilisation certificate) an thehluh hnuah Mizoram sorkar chuan pawisa a pe leh dawn a; nimin thleng kha chuan Hlimen khawtlang hruaitute'n utilisation certifcate an la thehlut lo a ni.

In pahnih sak zawh tawhah hian chhungkaw 20 an lut tawh a, chawlhkar leh lamah in pahnih dang an sa leh dawn a, chutah chuan chhungkaw 21 awm tura ruahman a ni.