Intodelh & Career Campaign buatsaih

Students' Self-Support Union (SSU) chuan nimin khan Vanapa Hall-ah zirlaite pualin Intodelh & Career Campaign 2024 an buatsaih a; minister C Lalsawivunga'n hmanpuiin, 'Duhthusam Ram' Volume-I lehkhabu a tlangzarh. Minister chuan, mahni intodelh tur leh chhungkaw enkawl nan hna hnuaihnung leh zahthlak a awm loh thu a sawi.

C Lalsawivunga chuan, Mizoram state puitling a nih hnuah hmasawnna tam tak awm mah se, intodelh tur leh leh hmasawn turin ṭan lak a la ngaih nasat thu a sawi a, "Sum leh pai, ei leh bara intodelh turin tun aṭang hian bul ṭan a ngai a, zirlaite'n ṭan in la hi a lawmawm. Mizo kutchhuak leh thar chhuahte hnualsuat loin, chawi lara ngaihsan nachang hriat a ṭul a, hei hi intodelh beihpui thlak kawnga pawimawh hmasa a ni," a ti.

Hand holding policy hnuaiah kutkawih eizawnna lam kal, mahni kutkea din tumte tan sorkar a inhawn reng thu sawiin Minister chuan, "Hmasawnna kawng dika kan ramin ke a pên theih nan exam-naa pass ringawt duh tawk loin, thiamna tak tak neih tum ang che u. Hmasawnna kawng dik zawh turin zirnaah hma kan sawn a ngai," a ti a; Mizoramah chauh hna zawng lo a, India rama hna lakna lian tak takah tling thei tura rinawm leh taima taka inzir turin zirlaite a fuih.

PHE department-a Project Management Unit director H Duhkima chuan, zirlaite chu khawvel changkang leh hmasawn zel ken tel zirna puitu hmanraw ṭha tak takte chhawr ṭangkai tum tura a fuih a; internet chu zirlai puitu piah lamah rinrâwla neih tum lo tur leh lehkhabu ṭhate chhiar tam zawk turin a chah.

SSU hi May 27, 1985 khan Hrangbana College-ah din a ni a; zirlai ni chunga intodelhte hnenah kum tin Rs 20,000 leh thuchei keng Self Support Award an hlan ṭhin. Intodelh & Career Campaign hi zirlaite tana intodelh beihpui thlâkna leh zirlaite an kalna àwm kawng kawhhmuhna a ni.