Champhaiah Experiential Learning Centre

Ministry of Information & Broadcasting hnuaia cheng nuai 100 sênga Chmaphai New Market (CHANEM)-a din Experiential Learning Centre (ELC) chu nimin khan Champhai DC James Lalrinchhana'n a hawng. Champhaia ELC hi Mizorama a hmasa ber a n a, hmarchhak state-ah Sikkim leh Manipur-te chiahin an la nei.

Champhai DC chuan, ELC chu zir thiamna hmun ‘Educational Centre’ a nihna ngai pawimawh tura mipui a chah a, "ELC hi zirlai naupangte thiamna inthukru pho chhuaktu, ram enkawl leh thil ruahman an thiam phah theihna leh thiamna tak tak pe chhuaktu ni thei se ka duh," a ti.

Bawrhsap chuan, Champhai district hmasawnnate tarlangin, Champhai District Hospital-ah ICU khawl hrang hrang cheng nuai 40 man bun a nih tawh thu a sawi a, "Hmunhmelṭha-Zote inkar kawng thawm ṭhat a ni a, sikul pahnihah computer 10 ve ve bun tum a ni," a ti a; IB Ministry nen thawkhoin Champhai district-a khaw tinah naupang tan film chhuaha HIV/AIDS leh Drugs Awareness Campaign neih tum a nih thu a sawi.

Champhaia ELC din tur hian August 7, 2023-ah hmalak ṭan a ni a, artificial intelligence leh virtual reality hmang Gaming Zone, HoloWorld leh video fiah zawk (high definition) hmanga thil awm dan inhrilhfiahna hmun Viewing Room-te a awm.

ELC din nan IB Ministry aṭangin cheng nuai 100 hmuh a ni a, a hmunhma chei nan leh khawl bun nan cheng nuai 92.39 sèn a ni tawh. Sum hman bâng Rs 7,60,203 chu ELC tihchangtlun nan hman leh tura ruahman a ni.